Pathian Thukham Pahra
(Suahlannak 20:2-17 le Daan Peksaknak 5:6-2)
434. “Saya pa kumkhua nunnak ngah thei dingin ziang ka tuah ding?” (Matthai 19:16)
Jesuh in hi thu a sut tupa ih hnenah hi tiin a let: “Nunnak ngah na duh a si le thukham pawl thlun aw”. Cun Jesuh in hitin a sim bet: “Ra aw la in thlun aw” (Matthai 19:16-21). Jesuh ih dung kan thlun a si le thukham kan thlun a ṭul. Daan cu siat bal a si lo. Milai cu Jesuh sungah daan hmu sal thei dingin sawm a si. Jesuh in daan cu a maih sungah a famkim ter; daan ih sullam a phuang ih daan cu cat loin a dik a si tiah a fiang ter.
435. Jesuh in ziang tin daan ih ti can a sim?
Jesuh in daan ih ti can cu hi tin a sim fiang: “Na Bawipa na Pathian cu na thinlung, na thlarau le na ruahnak zaten na duhdawt pei. Hi mi cu thukham lakih a tumbik mi thukham a si. Cun a pahnihnak thukham cu: na innhnen cu nangmah le nangmah na duhdawt awk bang tukin na duhdawt pei. Hi thukham pahnih parah daan hmuahhmuah le prophets hmuahhmuah a ṭhum aw a si” (Matthai 22:37-40).
436. Thukham Pahra cu ziang ti can a si?
Thukham Pahra timi cu “ṭongkam pahra” tinak a si (Suahlannak 34:28). Hi ṭongkam pahra in Pathian in Moses hnen ihsin Isarael pawl hnenih a pek mi Thukam cu a tawi zawngin a sim a si. Hi Thukham Pahra ih a hmaisa pathum cu Pathian duhdawtnak thu a siih a neta pasarih cu innhnen duhdawtnak thu a si. Cun hi Thukham Pahra in Pathian ih hril mi miphun pawl le a hleice in mimal pakhat ciar hrangah sualnak sal sung ihsin luat in nunnak lamzim a khih hmuh sal a si.
437. Thukham Pahra le Thukam ih pehthlaih awknak cu ziang a si?
Thukamnak sungah Pathian in amah le amah a phuang awih amah ih duhnak a lang ter a si ruangah Thukham Pahra cu himi Thukam ih duhdan thawn zoh ding a si. Thukham thlunnak in milai in Pathian ih ta an sinak an lang terih duhdawtnak thawn Pathian ih a kawhnak khal lungawinak thawn an sawn a si.
438. Pawlpi in Thukham Pahra ih thupitnak cu ziang tin a lang ter?
Pawlpi in Baibal le Khrih ih zirh mi le hmuh mi pawl sirh san in Thukham Pahra ih thupitnak le ṭhatnak cu a cohlang a si. Zumtu zaten thukham thlun ding ṭuanvo kan nei.
439. Ziangruangah Thukham Pahra in hmunkhat sinak a cang ter?
Thukham Pahra in ṭhen thei lo pumkhat sinak a tuah. Ziangruangah tile thukham pawl cu pakhat le pakhat an khih hmuh aw a si. Cun Thukham pakhat ciar in a zate komih Thukham khal an khih hmuh thotho a si. Curuangah thukham pakhat kan thlun lo a si le thukham zaten a thlun lo thawn kan bang aw a si.
440. Ziangruangah Thukham Pahra cu thlun tengteng a ṭul?
Thukham Pahra cu thlun tengteng a ṭul a si. Ziangruangah tile milai ih Pathian hnenih tuah ding ṭuanvo le a innhnen pawl hnenih tuah ding ṭuanvo pawl cu Thukham Pahra in a simfiang a si.
441. Thukham Pahra thlun a theih maw?
Thukham Pahran kan tlun thei a si. Ziangruangah tile Khrih in amah ih Thlarau le zaangfahnak laksawng thawn Thukham Pahra thlun thei dingin in bawm a si.
