Pope Leo ih Lebanon le Turkiye a Tuukhal khualtlawn ding caanhman ding daan suah. (October 27, 2025)

Pope Leo XIV ih ramleng a Tuukhal khualtlawnnak cu a hmaisabiknak a Tuukhal khualtlawnnak a si ih Pope dinhmun ih 2025, November 27-December 2 tiang Turkiye le Labanon ram pawlah a tlawng dingih cu mi cu a hmaisabik Nicaea an rak tuahnak kum 1700 kum kim ni thawn khal a kaih aw.

Tlawngkai nikhat ni ah Holy See Press Office zungin Pope ih a Tuukhal khual tlawnnak ding caanserh hman ding daan an rak suah. Pope ih a Tuukhal tlawnnak cu November 27 ni ah Turkiye ram ah a tlawng thok ding a si.

An Khuapi a si mi Ankara ih Pope a thlen tikah Pope in rampi President Recep Tayyip Erdogan thawn an tongaw dingih cui hnuah Turkiye ram ih thuneitu pawl, mipi pawlkom ih aiawhtu pawl, ramtin ih ram palai pawl hnen thu simnak a nei ding. Anetnak ah Pope cu Turkiye ram ih khuali pi a si mi Ankara in Istanbul ah vanzam thawn a feh bet ding asi.

Turkiye ram ah Pope ih a hmaisabik caan hman ding mi November 28 ni Tlawngkai ninga ni ah Pope Leo cu Istanbul khuapi ih Cathedral of the Holy Spirit Biakinn pi ah Parish Priest, Puithiam pawl, biaknak lam ih hnatuantu pawl thawn tonnak caanserh a hmang ding asi. Zing tlai lam ah Pope in Little Sisters of the Poor ih kum upa pawl umnak inn ah vevaihnak a nei ding a si.

Cui hnuah helicopter thawn Nicaea ah a feh dingih a tu ah cun iznik tiah an ko. Cui hmun ah Pope cu Saint Neophytos ih ancient Basilica kiang ih tuah ding mi biaknak lam lungrualnak thlacamnak caanserhah a tel ding.

Cui ni thotho ah Pope cu Istanbul khuapi ah a kirsal dingih Apostolic Delegation ah Bishop pawl thawn tonnak caanserh a hmang ding a si.

November 29 zarhte ni ah Pope Leo in zianglam ah hminthang zet mi “Blue Mosque” ti kawh mi Sultan Ahmed Mosque ah a leng ding. Cuihnuah Mor Ephrem ti mi Syriac Orthodox Biakinn ah cui hmun ih biakinn lam hotu pawl le Christian hotu pawl a dangten tonnak caanserh a hmang ding.

Sunhnu ah Pope in Constantinople ih an hmunpi bik a si mi Saint George Biakinn ah doxology thlacamnak ah a tel ding.

Thlacamnak an theh in Pope Leo XIV in Ecumencical thu ah Patriarch Bartholomew I thawn tongnak caanserh an hmang dingih cuihnuah Patriarchal Palace ah an pahnih ih lungkimnak ca parah lethmat thutnak a nei ding.

Cui ni zanlam ah Pope in Istanbul ih Volkaswagen Arena ah Missa raithawinak hoha in a tuah ding. Holy Father ih November 30 Zarhpi ni hrang ih caanhman ding daan cu dungthluntu Andrew ih puai ni thawn a kaihawk vekin Armenian Apostolic Cathedral Biakinn piah feh in thlacamnak thawn a thok ding a si. Zinglam tlai deuh ah Pope cu Patriarcha Church of Saint George biakinn pi ih tuah ding mi Divine Liturgy ah a tel ding. Cu mi theh ah Pope in ecumenical blessing (biaknak zate lungrualnak) caanserh ah a tel dingih cui hnuah ecumenical Patriarch) thawn suncaw ei nak an nei tlang ding.

Sunhnu ah Istanbul ih Ataturk Airport ih tuah ding mi thlahnak caanserh an tuah theh hnuah Pope cu Vanzam thawn Lebanon ram Peru khuapi ah a Tuukhal khualtlawnnak a peh bet ding asi.

Pope cu Labanon ram a thlen veten Ramuk tu President, President of the National Assembly le Lebanon ih Prime Minister tonnak a nei ding. Cu mi thehah Lebanon thu neitu pawl, mipi aiawh pawlkom pawl le ram tin ih Palai pawl hnen thu cahnak a nei ding a si.

Pope Leo hrangah December 1 ni cu a hna tam bik ni a si ding. Pope cu zinglamah Annaya ih um mi Saint Maroun Monastery (Siangbawi tlawng) sungih St. Charbel Makluf thlan ah a feh ding. Cutawk in Pope cu Harissa ih um mi Shrine of Our Lady of Labanon ah a feh ding. Cuihmun ah Pope in Bishop pawl, Puithiam pawl, thukham pathum a la tu pawl le biaknak lam riantuantu pawl tonnak a nei ding. Zingtlai deuh lam sun hrawngah Apostolic Nunciature ah Catholic Patriarchs pawl thawn a dangten tonnak a nei ding.

Sunhnu ah Pope cu Beirut in Martyrs Square ah tuah ding mi biaknak lam lungrualnak thawn pehpar mi biaknak karlak ih tonawknak hoha ih a tuah ding asi. Cuihnuah Bkerke ih um mi Maronite Patriarchate hmai tual rawnah Lebanon ih mino pawl thawn an tongaw ding.

Pope ih a Tuukhal khualtlawnnak ni netabik ni a si mi December 2 Tlawngkai ni 2 ni ah Pope in Jal ed Dip ih um mi De la Croix Hospital ah riantuan tu pawl le mi naa pawl a veh ding a si. cuihnuah Pope Leo XIV cu 2020 kum ih a cang mi Beirut tipi kap ih puakkuainak hmun (Port explosion site) ah daite in thlacamnak tik cu caan a hmang ding.

Cuihnuah Holy Father in Beirut Waterfront ah Missa raithawinak hoha in a tuah dingih cu mi cu Pope ih Lebanon a Tuukhal khualtlawnnak ih neta bik caanserh a hmang ding nak asi.

Pope Leo XIV cu sunhnuah Beirut in a pok ding. Vanzam thawn Rome khuapi ih Fiumicino International Airport ah zanlam nazi 4:00 pm hrawngah a thleng sal ding a si. Hi mi thuthang cu Vatican thuthangin a tawizawng le a remcang thei bik dingih kan ngan mi asi. Kan thuthang a rak siartu zate parah Pathian thlasuahnak um hram seh.