411. Pawlkom in dingnak le tawkzawn ruah thiamnak a hnget khoh ter maw?
Pawlkom in milai ih upat tlak sinak le thilti theinak cu ṭhaten a upat a si ah cun dingnak le tawkzawn ruah thiamnak a hnget khoh ter a si. Cuih hleiah mimal pawl le pawlkom pawl in um dan ṭhaten a tuah sakih an tumtah mi ṭhaten ngah thei dingin a bom a si le pawlkom in dingnak le tawkzawn ruah thiamnak tha a pek ih a pehzom vivo a si.
412. Ziang mi parah milai in kan bangrepawknak a ṭhum aw?
Milai pawl cu Pathian ih hmuihmel kengih sersiam mi kan si ih Pathian in bang aw ten thlarau in pek; kan dinhmun le sinak siseh cun kan suahkehnak khal siseh bang aw ten in tuah a si ruangah upattlak sinak le thilti theinak cu bangrep ten kan co tlang a si. Cun in runtu Khrih ah kan zaten Pathian in in ko.
413. Milai ih dingnak le zawnruah thiamnak bangawk lonak cu ziang tin kan tuah ding?
Leitlun ah a ṭhalo mi milai umdan le bangaw loih sumpai tuahnak a um ih siarcawk lo milai tampi in harsatnak an tong. Hi dinhmun le sinak bangawk lonak cu Thuthangṭha, dingnak, milai ih upattlak sinak le daihnak thawn an kalh aw a si. Hivek ih dinhmun le sinak bangawk lonak a um tikah milai pawl cu Pathian in tirhsiannak, zaangfah thiamnak le thilri hlawmawknak nei ding in a duh a si.
414. Lungrual tei ṭankhawmnak cu ziangtin kan lang ter?
Lungrual teih ṭankhawm nak cu neih mi thilri hlawm awknak, hlawh man ṭha teih peknak, umtu khaw sak dan ṭha sinsin dingih zuamnak in kan lang ter thei a si. Thinkhat lungkhat teih pumkhat sinak cu leitlun thilri hlawm awknak hnak ih a ṭhasawn le man a nei sawn mi thlarau lam thu le hla hlawm awknak in kan tuah thei a si.
