3. Nunphung thawn a pehpar aw mi kiangkap
148. Hrekkhat minung pawl le pawlkom awk nak pawl ah thilthar tuah suak thiam nak, tirhsian nak pawl kha hmuh a theih. An kiangkap dinhmun ah rikhiah nak pawl lehrulh nak ah, mai um hmun kiangkap ah kan duh lo mi dinhmun pawl kha mal ter dingah tuah in, daan nei lo, hmunhnget nei lo ih dinhmun ah um thiam dingin an zuam.
Tahthim nakah hrekkhat hmun pawl ah innsiat, innhlun pawl ih a um tu hrekkhat pawl cu innsung lam kha mawi zetin an ceimawi ih hrekkhat ahcun kiangkap mi pawl ih zangfah lainat thiam nak, pawlkom thiamnak pawl kha zoh in an lungkim asi. Um duh lo nak hmun kiangkap ih a um tu pawl hrang, kiangkap ih a tha mi pawlkom nak dinhmun cu ruahsan nak a pe ding asi. Mi harsa hrekkhat cu mai harsat nak sungin cawntlak mi kiangkap dinhmun ah hman asi.
Minung tamnak veng pawlah um a harsa ko nan innhnen pawl thawn nelaw in a hlunghlai zet mi pawlkom nak neih nak in an pahtlang thei asi. Mitin ih thinlung sungah minung pawl rualrem nak le khat le khat nelaw zet ih kom awknak kha an tuah thei ruangah, duhdawt nak thawn pawlkom nak kha an tuah suak thei ih kiangkap ih rikhiah dinhmun pawl kha mal deuh dingah tuahsuak thei asi.
Cutin minung pawl cu khuitawk hmunram khal siseh, leitlun hremhmun thawn a bangawk nak hmun ih minung sinak thawi a um thei mi dinhmun kha tuah suak thei nak an nei.
