India Catholic Bishop conference (CBCI) ih President asi mi Thrissur ih Archbishop Andrews Thazhath in Pope Leo XIV hnen feh in India ih tlawng dingah a rak sawm. 2025 October 22 ni ah Vatican ih an tonawk laiah Archbishop Andrews Thazhath cu Indian Catholic aiawh dinhmun in Pope hnen ah official letter ( sawmnak ca) a thunlut ih Indian ramah Catholic mipum 20 million luan in hmuak dingah an ruahsan thu a langter.
A sawmnak ca ah a mah in India Catholic Pawlpi thu famkim zetin ngan mi Ca khal a rak telh cih. Cui ca sungah Pawlpi ih cangvaih daan pawl, a tui an ton mi harsatnak pawl le a thupi mi bawmnak pawl kha langternak SWOT check felnak pawl khal a rak tel.
India ram ih Pope pawl an rak tlawnnak thuanthu cu a langsar zet a si. Pope Paul VI cu 1964 ah a hmaisabik Bombai khuapi ah a rak tleng ih cui hnu 1986 le 1999 kum ah Pope John Paul II khal in a rak tlawng sal. 1999 kumah a mah in new Delhi khuapi ih “Church in Asia” ti kawh mi a thupi mi ca a rak suah.
Pope Franci khal India ih tlawng dingah a duh nan 2017 kum ah ramkhel lam thawn pehpar mi a tlai ruangah a Tuukhal khual tlawnnak a rak tuah ngah lo. Cu mi ai ah Myanmar (Kawlram) le Bangladesh ah a rak tlawng. Neta ah tlawng dingah ruahsannak pawl a nei ko nan a hardamnak in tlin lo ruangah Indian ram ah a rak tlawng ngah lo nak a si tiah an sim.
