Zumtu Minung thawnghra lenglo in Pope Leo XIV ih remdaihnak hrang St.Peter tualrawn ih Rosary camnakah tel. (October 11, 2025)
Pope Leo XIV cu Oct 11, 2025 ni zarhte ni ah Rome khuapi ih St.Peter tualrawn ih remdaihnak hrang Rosary thlacamnak ah Fatima Bawinu Maria zuk hmaiah dingin thlacamnak a rak nei.
Leitlunpi remdaihnak hrang thlacam dingah minung thawnghra lenglo zumtu tampi cu Zarhte ni ah St.Peter tualrawn ah Pope Leo XIV thawn thlacamnak an rak nei.
Portugal ram in Rome ih rak phurh mi Our Lady of Fatima zuk hmaiah Oct 11-12 tiang tuah mi Bawinu Maria thawn pehpar mi Jubilee caanserh pawl hrangah Pope Leo in zumtu pawl cu Pathian ih nu a si mi Bawinu Maria hnen ap in Pawlpi hrangah “Ruahsannak thawn khawmzawhtu” ti mi tumtah thei dingah thlacamnak thawn a rak ap.
St.Peter tualrawn ih tuah mi a hleice ih Rosary thlacamnak ah Pope Leo in Rosary thlacamnak le Bawipa thilesa upa peknak karlakah a tawi zawngin thucahnak a rak nei.
A thucahnak sungah Pope in zumtu pawl hnen Pathian ih nu Bawinu Maria hnenah “thu ngai thiamnak thinlung” kha dil dingah a rak forh ih Pathian ih aw khal ngai theinak thinlung thawn thlarau thazaang theihkaunak khaisang dingah a rak forhfial.
Rosary thlacamnak sungih Khrih ih thuthangtha a sim laiah Pope Leo in leitlun remdaihnak cu “thuneihnak le Paisa” in ngah a theih lo. Thlacamnak le thudik thawi nunlawngah a ngah thei mi asi tiah a rak sim. Pope in thlacamnak ih a san kha hawl dingah zumtu pawl hnen a rak sawm ih Pathian ttongkam ih kan thinlung kan on lawngah a dik mi lungrualnak le remdaihnak ngah thei a si tiah ralrinnak a rak pe.
“Nan kut pawl kha remdai ten um thei dingah hriamhrei pawl kha thlah aw. A sinan cu mi hnakih a thupi mi cu nan thinlung sungih hriamhrei thlah phoih thei ding kha a si. Vei tampi ka sim zo vekin remdaihnak ti mi cu hriamhrei um lo kha a si ih mitmeng phah in hriamhrei thlah kha a si”tiah Pope in a rak sim.
Pope in leitlun thuneihnak neitu pawl hnen “hriamhrei ret nak cu thazaang malnak a si lo, remdaihnak hrangih thudik thuhman le ralthatnak thinlung kha a tul” tiah a sim ih remdaihnak cu thazaang thawn a si thei lo thu ralrinnak a rak pe.
Pope in ziangvek ruahnak, zumnak a silole daan a si khal le minung thahnak cu a hman lo mi a sithu a rak sim. Pope in pehbet in remdaihnak le tuahmawhnak, siatsuahnak cem dingah ruahnak a nei tu pawl hnen “raltha awla thlah phoih hlah” tiah a rak forhfial. Leitlun ah a hman mi duhdawtnak le remdaihnak a karhzai tertu pawl hnen le mai ral pawl kha nehrawk lo in remdaihnak a tuah tu pawl hnen Pathian in lungawinak le ruahsan kha a pe theu asi” tiah a rak sim bet.
Hi mi thuthang cu Catholic news agency thuthangin a tawizawngin kan ngan mi a si.
