377. Ziazaṭha (virtue) kan timi cu ziang a si?
Ziazaṭha le dingnak kan timi cu cat lo bang lo ih ṭhatnak tuah ringring khi a si. Ziazaṭha le dingfelnak ih tumtah mi cu Pathian cannak a si tiah mi thianghlim Gregory of Nyssa in a sim. Milai ziazaṭha le Pathian ziazaṭha tin phun hnih an um a si.
378. Milai ziazaṭha (human virtue) kan timi cu ziang a si?
Milai ziazaṭha kan timi cu kan ruahnak le zumnak thlunih kan tuahmi le kan ruahmi pawl lamzin a hmuh tu thuruah thiamnak le sa duh thahnak ih famkimnak a si. Ṭhatnak tuah ringringnak in milai ziaza cu fimkim le ṭhanso ter ding a si. Pathian ih zaangfah lainatnak in thianhlim ter an si.
379. Milai dingnak kan timi cu ziang an si?
A thupizet mi milai ziazaṭha kan timi cu mirang ṭong in “cardinal virtues” tiah kan ko. Cumi cardinal virtues pawl cu: fimkhurnak, dingfelnak, thazaangcahnak le supnak tla an si.
380. Fimkhurnak kan timi cu ziang a si?
Ralrinnak kan timi cu ziangtik caan khal ah thil um tu daan thlirih a ṭha mi hmuh thei mi le a hman mi hril thiam khi a si. Ralrinnak in a dang ziazaṭha pawl a hruaikai ringring.
381. Dingnak kan timi cu ziang a si?
Dingfelnak kan timi cu cat loin a dik mi le a tlak mi midang parih tuahnak a si. Pathian hnenih tuah mi dingfelnak cu biaknak ziaza ṭhatnak tin kan ko.
382. Thazang cahnak kan timi cu ziang a si?
Harsatnak kan ton tikah thazang cahnak in hnget khoh nak in pek ih ṭhatnak tuah dingih kan zuamnak hngetkhohnak thazaang in pek.
383. Supnak kan timi cu ziang a si?
Supnak in nomduhnak ih lam hruainak ah feh sual lo dingin in bawm. Cun sersiam mi thilri hmangsual lo dingin supnak in in bawm.
384. Biaknak lamih ziaza ṭhatnak cu ziang an si?
Pathian cu biaknak lamih ziaza ṭhatnak pawl ih hrampi a si. Thianhlimnak zaangfahnak laksawng ih pehzommi a si bang tuk in biaknak lamih ziaza ṭhatnak pawl in milai cu Thumkom Pathian pakhat thawn nung tlang dingin thazang an pe. Biaknak lamih ziaza ṭhatnak pawl cu Khristian ziaza ṭhatnak cangvaihnak ih hrampi le thazang an si. Milai ziaza ṭhatnak pawl cu biaknak lamih ziaza ṭhatnak pawl in nunnak an pek. Biaknak lamih ziaza ṭhatnak pawl cu Thianghlarau ih umpinak le cangvaihnak ih thukam an si.
385. Biaknak lam ziaza ṭhatnak pawl cu ziang an si?
Biaknak lam ziaza ṭhatnak kan timi pawl tla cu: zumnak, ruahsannak le duhdawtnak tla an si.
386. Zumnak ziaza ṭhatnak cu ziang a si?
Zumnak cu biaknak lam ziaza ṭhatnak a si. Cumi in Pathian le kan hnenih ziangkim in phuansuak mi pawl kan zum a si. Cun Pawlpiih in sim le in zirh mi khal kan zum a si. Zumnak ruangin milai cu amah le amah Pathian hnenah zalenzet in a pe aw a si. Curuangah zumtu cun Pathian thei dingin le duh thei dingin a hawl a si. Ziangruangah tile “zumnak cu duhdawtnak thawn hna a ṭuan a si” (Galati 5:6).
387. Ruahsannak cu ziang a si?
Ruahsannak kan timi cu kan nomnak le lungawinak a si mi Pathian hnen in a ra ding mi kumkhua nunnuamnak kan duhmi le kan hngahmi a si. Hi vekih kan hngah tikah kan zumnak cu Khrih ih thu in kam mi a si tiah kan retih Thiang Thlarau ih bomnak le zaangfahnak kan rinsan a si.
388. Duhdawtnak timi cu ziang a si?
Duhdawtnak timi cu ziang tin kim hnakih Pathian kan duhdawt theinak dingin le kan inn hnen pawl kan mah le kan mah kan duhdawt bang tukih duh thei dingin in bawmtu ṭhatnak a si. Jesuh in duhdawtnak cu thukham thar le daan famkim tertu ah a tuah. Duhdawtnak cu “famkimnak hrampi a si” (Kolose 3:14). Cun ṭhatnak hmuahhmuah ih hrampi khal a siih nunnak, thahthawhnak le rualremnak a pe a si. Duhdawtnak tel lo cun “kei cu thulolak men ka si” ih “zianghman ngah mi ka nei lo” (1 Korin 13:1-3).
389. Thiang Thlarau ih laksawng pawl cu ziang an si?
Thiang Thlarau ih laksawng pasarih pawl cu: (1) fimnak (2) theithiamnak (3) ruahthiamnak (4) ralṭhatnak (5) thutheinak (6) zuamnak le (7) Pathian ṭihzahnak pawl an si.
390. Thiang Thlarau ih rah pawl cu ziang an si?
Thiang Thlarau ih rah hleihnih pawl cu: (1) duhdawtnak (2) lungawinak (3) daihnak (4) thinsaunak (5) mi zaangfahnak (6) ṭhatnak (7) terhsiannak (8) nunnemnak (9) thukam hngetkhohnak (10) ralrin thiamnak (11) mah le mah ralring tei umnak le (12) lei tisanak ih thianhlimnak (Galati 5:22-23) an si.
