Thil Duhzetnak le Ziaza

370. Thil pa khatkhat duhzetnak kan timi cu ziang a si?

Thil duhzetnak kan timi cu thinglungih theithiamnak le thil tuah ding maw tuah lo ding lole a ṭha maw ṭha lo timi parih thinlung cangvaihnak a si. Thil duhzetnak kan timi pawl cu a thlang pi thu in: duhdawtnak, huatnak, thilduhnak, ṭihnak, nomnak, riahsiatnak le thinhengnak tla an si. A thupibik le a lubik thil duhzetnak cu duhdawtnak a si. Mi pakhat in thilṭha lawng a tak in a duh ding a si.

371. Ziaza lamin kan zoh tikah thil duhzetnak pawl kan timi cu an ṭha maw, an sia?

Thil duhzetnak kan timi pawl cu thinlung cangvaihnak a si ruangah a ṭha khal a si theiih a sia khal a si thei. Thilṭha an suah ter a si le an ṭha ih thil sia an suah ter a si le an ṭha lo. Ṭhatnak le dingnak ah lole ṭhat lonakah an cang thei a si.

Thinlung Ziaza

372. Thinlung ziaza kan timi cu ziang a si?

Thinglung ziaza kan timi cu thinlung sungih a um mi a siih milai ruahnak ih thuṭhen mi a si. Thilṭha tuah dingin lole thilṭhalo hrial dingin a lung a awi. Mi pakhat in ṭhaten a thinlung ziaza a ngai a si le a thinlung sungih a ṭong tu Pathian ih aw a thei ding a si.

373. Milai ih upattlak sinak cu thinglung ziaza hrangah ziang vek in hna a ṭuan?

Upattlak si dingin a dik le a hman mi lungput neih a ṭul a si. Himi upattlak mi sinak ruangah zokhal a thinlung thawn kalh aw in thil tuah ter ding a si lo. Cun zo khal, a bikin biaknak lam thawn pehpar aw in, a thinlung thawn kalh aw in thil tuah lo dingin lole tuah dingin don ding a si lo.

374. Ziang tin thinlung ziaza ṭha le hman dingin tuah a thei?

Thinlung ziaza ṭha nei dingin:

(1) Fimthiamnak zirhnak in siseh;

(2) Pathian ih Ṭongkam ṭhaten nunpinak in siseh;

(3) Pawlpiih thu zirhnak in siseh zuam ding a si.

Thiang Thlarau laksawng le mifim upa pawlih simnak le zirhnak khal a thupi zet. Cun thlacamnak le thinlung zoh awk salnak khal thinlung ziaza ṭha neihnak ding hrangah a ṭul zet mi an si.

375. Ziangvek daan pawl in milai thinlung ruahnak a thlun ringring ding?

Thinlung ruahnak thlun ringring tu dingah daan pathum an um:

(1) Ṭhatnak suak dingin ziangtik hmanah thilṭhalo mi tuah lo ding;

(2) Suidaan (golden rule) timi, “nangmaih parah tuah seh ti na duh mi cu midang par khalah va tuah ve aw” (Matthai 7:12);

(3) Duhdawtnak cu maih inn hnen le maih thinglung ziaza upatnak in a ra mi a si.

376. Thinlung ziasa kan timi in ruahnak sual a suah pi thei maw?

Ziang tik khalah milai in a thinlung ziaza ih thuṭhen mi cu upatnak a pek ringring a ṭul a si. Sihmansehla, veihnih veikhat cu a dik lo mi thuṭhen nak khal thinlung ziaza in a suah pi thei. Curuangah milai in a thinlung ziaza ah thil sual mi le a dik lo mi a um a si le a rem ringring a ṭul a si.