Thuthangtha simtu – Rev. Fr. David Kap Cin Mang
Caantluang Zarhkel (27) nak, Zarhte Ni,
October 11, 2025
RVA ihsin thuthangtha a rak ngai tu nan zate hnenah kan Bawipa Jesu Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu a thar in thleng hram sehla, hnangam daihnak in lo zel cio hram seh ti’n thlaza cam in cibai ka run lo buk hrih hai a si.
Tu hrawng kiangkap thuthang kan theih mi hi riahsiatnak le aihramnak thuthang lawnglawng an si deuh. Leitlun dinhmun ih vun thlir tik khalah lungawinak thuthang hnakin thinlung thlaphang tertu riahsiatnak thuthang hi a tam sawn ih theih mi a si theu.
Culaifang ah, kannih zumtu Khrihfa pawl hrangih lungawiza thuthang pakhat cu Pope Leo ih casuah mi hi a si. Pope Leo cun October 9 (mani) ah ‘Dilexi Te’ (Kalo Duhdawt Zo) timi thulu hmangin forhnak ca a suah. Hitivek ih Pope pawl ih casuah mi tete hi leitlun thil umdan thlir ih an suah theu mi a si ih zumtu Khrihfa pawl hrangah nunpit tlak zirhnak tha tampi suahpi tu an si theu.
Hi forhnak ca a suah mi sungin a thupi deuhdeuh pawl malte ka run lo hlawm ding:
- ‘Khrihfa zovek hmanin mifarah pawl hi khawtlang harsatnak petu ti’n ruat hlah hai seh. Mifarah pawl cu kanmaih innsang sungtel, kan lakih tel mi an si ve”.
- Duhdawtnak cun thil sidan/umdan taktak a thleng ter thei. (A sim duh mi cu: duhdawtnak kan neih taktak ahcun leilungpi khal tu hnakih umnak tha ah kan can ter thei tinak a si.)
- Thaizing ah si loin, Tuini rori ah minung zovek khal minung dinhmun ih upattlak a sinak hi langter ding kan si.
- Do ding ral hnakin duhdawt ding nunau le mipa lawng a hmutu Kawhhranpi hi kan leilungpi ih ttul bik mi a si.
- Dudawtnak timi cu ziangdang hnakin hringnun thlirdan le nunpit dan hi a si mai.
- Kawhhranpi cun hringtu Nu bangin lamzin a feh rero tu pawl a fehpi ih leilungpi in hringhrotu lawng a hmuh lai ah anih cun fate pawl a hmu. Leilungpi cun hruangdar a sak rero laiah anih cun lilawn a don rero lam asi.
A tlun ih Pope ih simmi pawl kan zoh tikah, duhdawtnak ih thupit zia le duhdawtnak kan ti tikah mifarah pawl parih hleice takih langter a tul zia a zirh mi kan hmu. Culawng siloin, hringtu nu pawl in fale pawl parih an neih mi duhdawtnak cu Kawhhranpi in leitlun mi pawl parih a neih mi duhdawtnak thawn tahthim tahratin Kawhhranpi ih thupitnak a langter mi khal kan hmu.
Tuini Gospel kan siar mi Lk 11:27-28 sungah mipi lakin nunau pakhat in ‘A lo hringtu le hnawi a lo fawh tu Nu cu mithluasuak a va si so’ ti’n a ti tikah Jesu Khrih cun, “Pathian thu a thei ih a thlun taktak tu pawl cu mi thluasuak an si sawn” ti’n a rak timi kan thei.
Mihrek cun himi an theih tikah Bawi Jesu hman in a nu hi thupi ah a rel lo sisi ti zawngin a sullam an rak la theu. Mt 12:48-50 sung kan zoh sinsin tla ahcun, na nu le na unau pawl in an lo tong duh tiih an rak sim tikah Jesu Khrin cun, ‘Zo so ka nu cu a si ih zo so ka unau pawl cu an si? Pathian thu a thei ih a thlun tu pawl hi ka nu le ka unau pawl an si’ ti rori’n a timi kan hmu thei a si. Curuangah a nu ziangih rel lo vek a bang taktak ko.
Asinan, Jesu Khrih cu Thukham thluntu a si lawng siloin, Thukham famkim ter tu a si vekin Thukham sungih ‘Nu le Pa upat aw’ a timi thawn kalh in a nu hi ziang siarlo in a um taktak pei maw timi ruah a tul. Curuangah Jesu Khrih ih sim duh mi taktak cu a Nu Mary hi Fap Jesu hringtu a si ruangih mi thluasuak a sinak hnakin Pathian thu ngai tu le thlun tu a sinak ruangih mi thluasuak a si sawn timi a langter mi a si ti zawngin minung tampi cun a sullam an let ve.
Lk 1:48 sungih kan hmuh mi amah Mary ih tongmi “A tu thokin mi hmuahhmuah in mi thluasuak in ti ding” a timi khalah Jesu Khrih a hrinsuak men ruangih mi thluasuak si loin Pathian ih simmi parah ‘Na thu bang tukin ka parah kim ko seh’ tiih a cohlannak ihsi rami sunloihnak a si.
Kawhhranpi in leitlun ih Pathian fale pawl a kaihruainak ah ziangti’n Pathian ih thu ngai in a thlun ding timi thu khalah Nu Mary ih keneh thlun hi a dingmi lamzin pakhat a si.
Pathian fate tha si thei dingah Nu Mary ih tlawng ah tlawngkai cio dingin Pope St. John Paul cun a rak sim theu. Amah rori khal leitlun mipi pawl a kaihruai nak ah Nu Mary a rinsan zet thu a rak sim theu ih Rosary thlah dah lo tu a sinak khal kan thei cio.
Tu hi October thla a si vekin Rosary Thla tla a si kha hngilh hlah uh si.
Zumtu kan zaten mi thluasuak si cu kan duh cio ko lo maw. Sankhat hnu sankhat ‘Mi thlusuak’ tiih kawh tlak bik mi Nu Mary hnenin mi thlusuak si ding dan zir cio uh si.
