Milai Ih Zalennak
363. Zalennak kan timi cu ziang a si?
Zalennak kan timi cu tuah ding lole tuah lo ding timi thuṭhen theinak le cu vek ih kan tuah tikah maih thil tuah mi parih ṭuanvo lak theinak khi a si. Ṭhatnak kan tuah sinsin a si le kan zalen sinsin a si. Pathian lamih zalennak a fek a si le zalennak in famkimnak a co vivo ding. Zalennak kan timi cu thil ṭhalo le thilṭha hril theinak khal a si. Thil ṭhalo kan hril a si le kan zalennak kan hmang sual tinak a si.
364. Zalennak le ṭuanvo cu ziang tivek in pehtlaih awknak an nei?
Zalennak in milai pawl cu an tuah mi thil parah ṭuanvo a nei ter.
365. Ziangruangah bulpak ciar in an zalennak cu hman theinak khuan an nei?
Upattlak sinak le zalennak hmannak khuan cu ṭhen theih a si lo. Curuangah hi khuan cu, a hleice in ziaza le biaknak lam thawn pehpar aw in, upatnak pek ringring a ṭul. Cun kumpi acozah thuneihnak khal in humhim a ṭul a si.
366. Pathian ih rundamnak lairelnak sungah milai zalennak in ziang vek dinhmun a nei?
Milai zalennak cu sual hrampi in a tha a mal ter. Hi thanemnak cu catlo ih sualnak in a tha a nem ter sinsin. Sihmansehla, kumkhua ih “kan luat ringring theinak dingin” (Galati 5:1) Khrih in in luat ter zo. Khrih thawn Pawlpi le leitlun ih zalen mi kan si theinak dingin Thiang Thlarau in a zaangfah lainatnak thawn thlarau zalennak ah in hruai a si.
367. Milai ziaza ih hram thoknak cu ziang a si?
Milai ziaza cu hram thoknak pathum parah a ṭhum aw:
(1) Kan hril mi thil a hmaan lole a ṭha;
(2) Tumtahnak; le
(3) Kimveel ih thil um tu zia pawl an si.
368. Kan thil tuahmi cu ziangtik caanah thilṭha a si?
Thil pakhat khat kan tuah tikah cuih kan thil tuah mi cu:
(1) A ṭha;
(2) Kan tumtah mi khal a ṭha; cun
(3) Kiangkap thil um tu daan pawl khal a ṭha a si le kan thil tuah mi a ṭha kan ti thei.
Thilṭha cangsuak dingin a ṭha lomi thil tuah ding a si lo. Cun kan thil tuah mi ṭha hmansehlah a ṭha lo mi tumtahnak kan neih a si ah cun kan ṭuannak cu a ṭha lo ah a cang ter. A ṭha mi tumtahnak kan neih miin a ṭhalo mi kan thil tuah mi cu a ṭha ter thei cuang lo.
369. Ziangtik caan khalah a ṭha dah lo mi tuahnak lole tuah mi a um maw?
A um a si. Ṭhimnakah, mi thahnak, miih nupi le pasal sualpinak, Pathian camsiatnak tivek pawl cu ziang tik caan khal ah a ṭha lo mi tuahnak an si.
