SACRAMENT VEK A DANG SUMNAK SACRAMENT PAWL
Sacramentals
351. Sacramentals kan timi pawl cu ziang an si?
Milai kan nunnak thianghlim ter dingah Pawlpi in thianghlim hmin sinnak pawl a tuah ih cu mi pawl cu sacramentals tiah kan ko. Thlacamnak a tel ih Pa, Fapa, Thiang Thlarau timi hmin sinnak le a dang hmin sinnak a phunphun pawl an tel. A thupibik pawl tla cu: thlawsuah peknak a phunphun, milai pawl hlannak le thilri pawl Pathian biaknak hrangih hlannak le peknak pawl tla an si.
352. Khuavang dawinak (exorcism) kan timi cu ziang a si?
Pawlpi in a thilti theinak thawn Jesuh ih hmin in milai lole thilri cu ṭhat lo nakih huham le cahnak ihsin humhim dingin le cu mi ṭhat lonak sung ihsin luat dingih thla a camnak cu khuavang dawinak tiah kan ko. Himi cu Tikholhnak pek tikah tuah a si ṭheu. Cun a dang caan khal ah Bishop pa ih thupeknak in siangbawi pakhatkhat in a tuah thei a si.
353. Pathian hnenih pek awknak phundang pawl ziang mi an um?
Mi Thianghlim pawl ih ruh le thilri pawl upatnak, biakinn lennak, khawm zawhnak, Missa le Mary zuk tivek khawsungih vahpinak, thinglamtah lampi thlunnak le rosary thlacamnak tivek pawl tla cu Pathian thawn naih aw sinsinnak dingih tuah ding mi Pathian hnaṭuannak an si.
Mithi Ruak Vuinak
354. Khristian thihnak le sacrament pawl cu ziang tin peh thlaih awknak an nei?
Zumtu pakhat a thih tikah Tikholhnak a ngah ihsin a thok mi nunnak, Christmas tha peknak sacrament ih thlarau thazaang peknak, Missa ih cah ternak, vancung ramih rawl donak puai tepnak pawlih famkimnak a thleng a si. Khristian thihnak ih ti can cu Jesuh ih thihnak le thawhsalnak ruangin fiangfai in kan theithei a si. Jesuh Khrih ih a thi tu Khristian cu “milai ruang pumpi ihsin inn ah Bawipa thawn a feh” (2 Korin 5:8) a si.
355. Mithi hrangih biaktuahnak in ziang mi a sim?
Mithi hrangih biaktuahnak in, hi leitlun in, thi hmansehla ni nikhat ah kan thosal leh ding a si timi a khi hmuh a si. Cun mithi hrangih thla kan camnak in mithi pawl thawn, thlarua lamih kan zoh tikah, hmun khat kan si tinak a lang ter.
356. Mithi hrangih biaktuahnak ih a thupitbik nak pawl cu ziang an si?
A tlangpi thu in mithi hrangih biaktuahnak cu ṭhen thum a um:
(1) Thinhnem awknak le ruahsannak thawn mithi hmuahnak;
(2) Baibal siarnak le thusimnak;
(3) Missa sumnak; le
(4) Mithi ih thlarau Pathian hnenih apnak le a thosal ding timi ruahsannak thawn phumnak tla an si.
