337. Nu le pa thawn pehpar aw in Pathian ih tumtahnak cu ziang a si?

Pathian cu duhdawtnak a si ih duhdawtnak in nu le pa cu a sersiam. Duhdawtknak in pakhat le pakhat duhdaw aw dingin nu le pa a forh. Pathian in nu le pa a sersiam ih an nun sungah ṭhit umnak in pakhat le pakhat ngaih thiam aw dingin le duhdaw aw dingin a ko. Nu le pa an ṭhit awk hnu ah cun “pahnih an si nawn lo ih pakhat ah an cang” (Matthai 19:5). Pathian in hi tin thlawsuah a pek: “karh zai uh” (Seemtirnak 1:28) a ti.

338. Pathian in ṭhitawknak sacrament a tuah tikah ziang mi tumtahnak a nei?

Pathian in ṭhitawknak sacrament a tuah tikah:

(1) Nu le pa an pahnih ih ṭhatnak ding hrangah;

(2) Fate neihnak ding hrangah; le

(3) Fate pawl ih fimthiamnak hrangah timi tumtahnak a nei. Pathian in nu le pa cu ziang tik hmanah ṭhen aw lo dingin tumtahnak a nei. Jesuh Khrih khal in hitin a nemhnget: “Pathian ih kom mi cu zo hman in ṭhen ter hlah hai seh” (Marka 10:9).

339. Ziang vek sualnak in ṭhitawknak sacrament cu a siatsuah tum ringring?

Sual hrampi ruangah nu le pa ṭhitawknak ih thu tiamkam mi cu pahbal dingin tukforhnak a um ringring. Sihmansehla, Pathian ih zaangfahnak thawn pakhat le pakhat pumkhat sinak hnget khoh dingin zangfahnak laksawng cu nu le pa hnenah Pathian in a pe ringring.

340. Ṭhitawknak thu thawn pehpar aw in Baibal hlun in ziang tin a zirh?

Pathian in daan le prophet pawl hmang in milai hnenah ṭhitawknak ṭhen a theih lo timi thu le pumkhat sinak thuk sinsin ih thei dingin a zirh. Pathian le Israel lakih thukam in Jesuh Khrih le a Pawlpi lakih Jesush ih tuah mi thukam thar a khih hmuh.

341. Ṭhitawknak thawn pehpar aw in Khrih in ziang mi thil thar a pek?

Khrih in ṭhitawknak cu sacrament pakhat ah a tuah. Cun nu le pa cu a cuangce mi laksawng a pek hai ih an ṭhitawknak cu Khrih in a nupi (bride) Pawlpi a duhdawtnak ih hminsinnak thawn a khih hmuh. “Pasal pawl Khrih ih Pawlpi a duhdawt bang tuk in nan nupi duhdaw uh” (Efesa 5:25).

342. Mi hmuahhmuah in ṭhi aw tengteng dingin ṭuanvo kan nei maw?

Nu le pa ṭhitawknak cu anaa a si lo. Ziangah tile Pathian in mi hrek khat pawl cu Vangcung Uknak hrangah nupi pasal neilo ih um dingin a ko. Hi vekih nupi pasal nei loih umnak in vancung ramthawn pehpar aw mi thilri pawl duhnak le sunsaknak thinlung a nei ter. Khrih in duhdawtnak a langter ih leitlun ih a ra ṭumsalnak ding khal a khih hmuh a si.

343. Ṭhitawknak sacrament cu ziang tin tuah a si?

Biaktuahnak a silole Missa sumnak sungah ṭhitawknak cu tuah a si. Mipi le siangbawi lole Pawlpi ih palai pakhatkhat le midang tetti pawl ih hmai ah ṭhitawknak sacrament tuah a si.

344. Ṭhitawknak ih lungkimnak lole thuthiam kamnak cu ziang a si?

Ṭhitawknak lungkimnak (consent) cu mipa (mopa) le nunau (monu) in pakhat le pakhat hnenah duhdawt awknak thawn pumpek awknak an langternak a si. Himi lungkimnak in Ṭhitawknak sacrament a tlamtling ter a si ruangah a ṭul tengteng mi a si. Cun thil dang thaw khal in thleng a theih lo. Hi lungkimnak cu zo hman in anaa in forhfial theih a si lo. Mah le thinlung sungin zalenzet in (free) a suak mi a si a ṭul.

345. Mipa lole nunau cu Cathlic a si lo tikah ziang mi tuah a ṭul?

Catholic le pawldang ṭhitawk ding (mixed marriage) a si le Pawlpi upaih lungkim pinak a ṭul. Cun Catholic le Tikholhnak a ngah lotu (Khristian a si lotu) ṭhitawk ding (disparity of cult) a si le ṭhitawk hlan ah bishop paih khuan peknak (dispensation) ngah a ṭul. Pawldang pakhat khat thawn siseh Khristian a silo tu thawn siseh ṭhitawk tikah ṭhitawknak ih tumtahmi (ends) pawl cu thlun tengteng ding a si. Cun fate pawl Tikholhnak pek ding ti khal tlun tengteng ding a si.

346. Ṭhitawknak sacrament ih ṭhatnak pawl cu ziang an si?

Thitawknak sacrament in nu le pa khar lakah kumkhua ih a hmun mi pehtlaih awknak a um ter. Pathian in nu le paih lungkimnak (consent) a ngemhnet. Curuangah a ṭhi aw zo tu nu le pa cu ziang tik hmanah ṭhen theih a si lo. Hi sacrament in nu le pa hnenah thianhlimnak ngah thei dingin in siseh, lungawi zet ih fate an cohlang theinak dingin siseh, an fate pawl hrangih fimthiamnak pek theinak ding hrangkhal ah siseh, a cuangce mi laksawng a pek.

347. Ziang sualnak pawl in Ṭhitawknak sacrament cu na pin a do dal?

Mi nupi lole mi pasal thawn sualnak le nupi tampi neihnak pawl in Ṭhitawknak sacrament cu nasazet in a siatsuah a si. Fa phihnak le nu le pa ṭhen awknak khal in Ṭhitawknak sacrament cu an dodal a si.

348. Ziang vek caanah Pawlpi in nu le pa ṭhen awknak khuan a pek?

Thu pakhat khat ruangah ziang tivek khal in um khawm a theih lo tikah Pawlpi in ṭhen awknak khuan a pek a si. Asinan, an pahnih ih a nun veve lai a si ah cun zo hman in midang thawn ṭhit a theih lo.

349. Nu le pa sinak in ṭhen aw ih midang thawn ṭhi aw sal tu pawl cu Pawlpi in ziang tin a ruat?

Pawlpi in, Bawipa ih thu zirh mi a tlun bang tukin, zungah ṭhen awknak tuah ih midang thawn ṭhi aw sal tu pawl cu Pawlpi in ziangtik hmanah a cohlang thei lo. “Zokhal a nupi a ṭhen ih a dang nupi a ṭhit sal a si le a ui re (adultery) a si; a pasal a ṭhen ih pasal dang a ṭhit sal a si le a ui re a si” (Marka 10:11-12). Pawlpi in cu vek ih a um tu pawl parah zaangfahnak a nei. Curuangah zumnak, thlacamnak, duhdawtnak hrangih hnaṭuannak, an fate le pawl Pathian thuzirknak pawl nei dingin tha a pek ṭheu.

350. Ziang ruangah Khristian inn sungsang cu ‘inn sungsang pawlpi’ (domestic church) tiah kan ko?

Khristian inn sungsang cu ‘inn sungsang pawlpi’ tiah kan ko. Ziangruangah tile milai innsang in Pathian ih innsang a si mi Pawlpi ih nuntu khawsak daan pawl cu a langter ih a nunpi ruangah a si. Innsang ih um pakhat ciar in Tikholhnak an ngah ih siangbawi hnaṭuannak an ngah mi cu an ṭuan ih thlacamnak, zaangfahnak laksawng, Khristian man neihnak le fate pawl hnenah zumnak a hmasabik ih phuannak hmun ah inn sungsang cu an cang ter a si.