322. Siangbawi Cannak sacrament cu ziang a si?

Khrih in dungthluntu pawl hnenih a ap mi rundamnak hnaṭuan cu Pawlpi in san cem tiangin siangbawi cannak sacrament thawn a ṭuan ringring ding.

323. Ziangruangah hi sacrament cu siangbawi cannak sacrament tiah kan ko?

Mi pakhat cu a sunglawi le a lamdang zet mi siangbawi cannak in Pawlpi sungah a lut. A hleice zetmi Thiang Thlarau ih laksawng ruangin hi siangbawi cannak sacrament in siangbawi pawl cu Khrih ih hmin le thilti theinak thawn Pathian ih miphun pawl hrangah hna an ṭuan.

324. Rundamnak hnaṭuannak ah siangbawi cannak sacrament in ziang vek in hna a ṭuan?

Siangbawi cannak sacrament cu Thukam Hlun sungah Levite mi pawl ih riannak sung, Aaron ih siangbawi sinak ah, khih hmuh in a rak um zo. Cun upa sawm sarih pawl ih hnaṭuannak thu pawl khal in khih hmuh cia a si (Mipum Siarnak 11:25). Hlanlai ihsin rak khih hmuh cia mi hi thinglamtah parih sumnak ruangin “Pathian le milai rualrem awknak a tuah tu” (1 Timote 2:5) le “Melchizedek ih puithiam si daan tlun in Puithiam Sang” (Hebru 5:10) Jesuh Khrih ah a famkim ṭheh a si. Khrih ih siangbawi sinak cu siangbawi hnaṭuannak ah a hmun a si.

325. Siangbawi cannak sacrament ah dot ziat a um?

Siangbawi cannak sacrament dot thum an um. Cumi pawl cu:

(1) Bishop cannak,

(2) Siangbawi cannak, le

(3) Deacon cannak tla an si.

326. Bishop cannak ih ṭhatnak cu ziang a si?

Bishop cannak in siangbawi cannak sacrament cu a famkim ter. Cun Bishop cannak sacrament in bishop cu dungthluntu pawl ih can ai awh tu ah a can ter. Cuih hlei ah bishop dang pawl thawn hmun khat ah a um ih Pope pa thawn hmun kip ih a um mi Pawlpi cu an kil khawi a si. Thuzirhnak, thianhlim ternak le uknak hnaṭuan khal bishop cannak in a pe a si.

327. Diocese pakhat sungah Bishop pakhat ih hnaṭuan cu ziang a si?

Bishop pa cu a maih ukmi diocese sungah hmuh thei mi hotu le Pawlpi ih hmunkhat sinak ih hrampi a si. Khirh ih palai a si vek in bishop pa in tuukhal hnaṭuan a ṭuan. Culen a maih siangbawi le deacon pawl in a hnaṭuan cu an bawm.

328. Siangbawi cannak ih ṭhatnak cu ziang a si?

Thiang Thlarau ih tacik khennak in siangbawi in Khrih ih hmin in hna a ṭuan thei a si. Bishop bawmtu a si vek in Thuthangṭha sim ding in siseh, a hleice in, Missa sumnak tuah dingin siseh, zumtu pawl ih tuu khal tu dingah siseh ṭuanvo a nei.

329. Ziangtin siangbawi in hna a ṭuan?

Siangbawi cu leitlun hrangih rundamnak hnaṭuan dingin siangbawi cannak sacrament pek a si. Asinan, a tlangpi thu in, siangbawi in a maih umnak diocese sungah midang siangbawi pawl thawn hmun khat in Pathian hna a ṭuan a si. Siangbawi pawl cu Bishop pa thawn pehzom aw in an maih diocese hrangah ṭuanvo an nei a si.

330. Deacon ordination ih ṭhatnak cu ziang an si?

Pawlpi rian dingah deacon cannak pek a si. Bishop pa ih sim mi vek in thuthangṭha simnak in siseh, sumnak in siseh, Pathian hrangih hnaṭuan le duhdawtnak hnaṭuannak cu deacon in a ṭuan a si.

331. Ziang ti vek in siangbawi cannak pek a si?

Bishop can tikah siseh, siangbawi can tikah siseh, cun deacon can tikah siseh, bishop pa in ordination a ngah tu dingih lu parah a kut a suangih thlacamnak thawn ordination a pek a si. Bishop pa in Pathian hnenah ordination a ngah tu in Thiang Thlarau co dingin le Thiang Thlarau laksawng co in hna a ṭuan thei nak ding hrangah thla a cam.

332. Siangbawi cannak cu zo in a pek thei?

Dungthluntu pawl ih can ai awh tu bishop pawl lawngin bishop cannak, siangbawi cannak le deacon cannak sacrament pawl an pe thei.

333. Zo in ordination a ngah thei?

Tikholhnak a ngah tu mipa pawl lawng in hi sacrament cu an ngah thei a si. Bawipa rori in hi vek ih tuah dingin a hril a si tiah Pawlpi ih a pom ruangah hi vek in tuah a si. Zo hman in amah le amah ordination ngah ding in a hril aw thei lo. Pawlpi sungih thu neitu pawl lawngin ordination ngah le ngah lo ding thu an rel thei.

334. Siangbawi pawl in nupi nei loih um a ṭul maw?

Bishop ṭuan tu ding hrangah cun nupi nei lo ih um tengteng a ṭul a si. Nitlaknak lam ih um mi Pawlpi (Latin Church) ah cun “vancung uknak hrangah” (Matthai 19:12) tin nupi nei lo dingin hril a si.

Nisuahnak lam Pawlpi (Eastern Church) ah cun nupi nei zo tu pawl khal siangbawi can theih a si. Asinan, siangbawi can ṭheh hnuah cun nupi ṭhit a ngah nawn lo. Asinan, kumkhua ih deacon ṭuan ding an si ah cun ordination pek thei a si.

335. Siangbawi cannak sacrament ih ṭhat nak cu ziang an si?

Hi siangbawi cannak sacrament peknak in Thiang Thlarau ih a hleice mi laksawng ngah a si. Cun Khrih ih hnaṭuan mi phunthum a si mi:

(1) Siangbawi hnaṭuan

(2) Profet hnaṭuan le

(3) Siangpahrang hnaṭuan khal ṭuanvo ngah a si.

Ordination in tahṭhim thei lo mi le a hmun ringring mi thlarau hmin sinnak ngah a si. Siangbawi cannak sacrament cu vei hnih pek/ngah a theih lo.

336. Zo ih thupeknak in siangbawi hna cu ṭuan a si?

Siangbawi pawl in Khrih sungah le Pawlpi in hmin lawngin siangbawi hna an ṭuan thei a si. Curuangah siangbawi hnaṭuan (ministerial priesthood) cu mi zakip ih siangbawi sinak (commom priesthood) thawn a bang aw lo ti a fiang.