Thuthangtha simtu – Saya John No Mang

Caantluang Zarhkel (26) nak, Nihnih Ni,

September 30, 2025

Ps 87: 1-7 “Hmundang hnak in Jerusalem cu a duh bik a si. Keimah ih thu a ngaitu ram pawl hmin ka khum tikah Izip le Babilon ram ka telh cih ding. Pilistine, Taiar le, Etiopia mi pawl cu Jerusalem sungah an tel ka ti ding” a ti.

Bawipa in mi hmuahhmuah cazin a tuah dingih Jerusalem khaw sung miah a ret thluh hai ding a si tihi kan hmu suak.

Hi mi vek hin tuiniah “Jerusalem ih hmin cazin” timi hmangin ron lo hlawm ka duh.

Hmin ka khum tikah, (asilole) cazin a tuah ding ti hi thuhmun khat a si. A tican cu mipum siar si lo in, khrih sanih khrih Jesuh in hi Jerusalemah hin kawhhran a din dingih, cui khrih le a kawhhran zumtu pawl ih hmin pawl cu cazin sungah ngan tahrat in khum a si ding ti a rak kawh hmuh sung a si. Cuti’n AD 33 ah Piter par ah khrih in a kawhhran cu a ron din ngaingai ti kan hmu.Mt 16:.

Hi khrih kawhhran a thok nak hram cu Penticost ni hin a si ih Jerusalem ah a si. Penticost 120, Piter in 3000, Dungthluntu 12 pawl in zumnak hrampi 12 an tuah. Cumi a zumtu pawl cu Baptisma la in hmin cazin an la vivo a si. Cucu Bible ih nunnak cabu hmin ngan a ti mi cu a si. Curuangah Jesuh khal in Thup 3:5 ah “Nunak cauk sung ihsin an hmin ka phiat lo ding. Ka pa le Vancung mi pawl hmaiah ka ta an si tiah langhngan in ka sim ding” a ti nak a si.

“Zokhal nunnak cabu sungih hmin ngan lo mi cu mei lipi sungah hlon an si” Thup 20:15, Curuangah u nau le uh vancungih hmin an kawh tikah keimah ka um ve ding ti hla kha, hi Jesuh din mi a kawhhran Jerusalem ih hmin cazin sung hmin khum hrih lo a si ahcun tui kan hla kha a bak ih sak sungah kan cang pang ding.

Cunah tuiniah hin Jesuh khrih ih din mi kawhhran Jerusalem ih hmin cazin sungah hin na hmin ron pe mai aw.