Thuthangtha simtu – Rev. Fr. David Kap Cin Mang
Caantluang Zarhkel (25) nak, Zarhte NI,
September 27, 2025
RVA ihsin thuthangtha a rak ngai theutu mipi pawl nan dam cio ko maw?
Kan Bawipa Jesu Khrih ih zangfahnak, Pa Pathian ih duhdawtnak le Thiang Thlarau ih pawlkomnak cu nan hnenah um hram sehla, pumsa thlarau thinlung harhdamnak le hnangam daihnak khal lo pe cio hram seh ti’n thlaza cam in cibai ka run lo buk hai a si.
Tuini Gospel kan siarmi Lk 9:43-45 sung kan zoh asile, minung ih ruahdan le Pathian ih cangvaihdan a kalhawk zia kan hmu thei.
Mipi cun Jesu Khrih ih thilmaksak tuah mi pawl an hmuh tikah mak an ti zet ih a huham cahnak zuan in a dung an thlun rero lai ah Jesu Khrih cun, ‘Milai Fapa cu phiar a si dingih thuneitu kut ah pek a si ding’ a timi an vun theih cu an hrangah oloksong za ngaingai a si.
Bawipai’ thutum le a mission cu minung ih uar zawng le duh zawngin si loin, thinglamtah parah thihnak tiang tuar ih in duhdawt thawn famkim ter a si sawn ding timi hi cohlan har zet pakhat a si. A dungthluntu pawl khal in an rak theithiam ban ve lo.
Nitin kan nunnak ih kan hmuhton theu mi thil khalah Pathian ih cangvaihdan hi kan hrangah theihthiam a har zet ngai. Kan hrangah thil maksak thluasuah thlen ter a duh caan ah Calvary lamzin ah in hruai hmaisa theu timi hi zumtu tampi ih tetti khannak ah kan thei theu ko ding. Hihi kan hrangah theihthiam har zet mi le ol teih cohlan thei lo mi thil pakhat a si.
Tuini a veikhatnak ih kan siarmi Zechariah 2:5-9 sungih Pathian ih tongkam kan theih mi in ruahsannak tumpi in pe. ‘Bawipa amah rori hi khuapi kimvel ah khuapi humtu meisa phar a si dingih cutawk ah a sunlawinak thawn a um ding’ ti a si.
Nitin kan hringnun ah kan thin in phang ter tu thlisia tilet boruak thalo phunkim inh, in zel theu hman sehla Bawipa amah rori in meisa phar dinhmun in in humhim, in kilveng ringring timi theih hngilh lo te’n zumfek cio uh si.
Zechariah tei san lai ahcun Babilon sal tannak ihsin Pathian ih kammi ram ah tlungsal in Jerusalem khualipi tundin sal thei le Biakinnpi saksal in zalen zet ih Pathian biak thei hi Pathian ih umpinak langter ti’n an rak ruat.
Asinain, tuih san Khrihfa pawl hrangah cun thinglamtah phur in Bawipai’ thawhsalnak nun kan tawm theinak ah Pathian ih in umpinak a lang sawn a si.
Khrihfa hrekkhat cun leitlun sumsaw lennak le hlawhtlinnak lawng hi Pathian ih umpinak le thluasuah lang tertu ti’n an pom ih an aupi theu. Hmansehla, tuini kan theih mi thuthangtha thawn cun a kalh aw nasa.
Kan Bawipa Jesu Khrih cu lennak taktak in pe dingin mifarah bik dinhmun in leilung ah a rung tum ti kan thei. Cuihleiah, thinglamtah phurin harsat tuar ih a thihnak thawngin sunlawinak taktak ah in hruai bet a si.
Hi thuthangtha ih cahnak huham a theifiang tu St. Vincent de Paul cun leitlun ih harsatnak a phunphun a tuartu le mifarah pawl ih harnak tuarpi in bomnak a peknak thawngin sunlawinak lamzin a rak hawl a si.
Tuini hi amah sunloihni a si vekin, amaih keneh thlun a zuam rero mi St. Vincent de Paul pawlkom sungtel pawl hrang thlacam ding tla kan mang cio pei.
Kanmah lala tla himi keneh thlun in sunlawinak taktak a co ngah tu si thei cio dingah St. Vincent de Paul ih thlacam saknak thawngin Bawipa in thluasuah in pe cio hram seh!
Pathian ih sunlawinak taktak cu minung ih cahnak, lennak le uarawknak ah si loin tangdornak, pumpeknak le zangfah lainatnak ah a si sawn timi hi tuini kan Cathianghlim ih in zirh mi a si.
