September-26
Natnak a phunphun zoh tu sibawi pawl kilkhawitu Mithianghlim Cosmas le Damian cu Arabian ram ih faphir an si. An mah cu Syria ram ah si vai lam an zir theh hnu ah Cilisia ram ih Agia ah an rak um ih cu tawk ah a thiam zet mi nat nak a phunphun zohtu sibawi ah an rak cang.
An fimthiamnak thawn an hnatuan cu an hlawhtling zet ko nain an tuam man paisa an lak dah lo. Cu tik vek in mi tampi cu Christian zumnak ah a cang. Kum (283), Diocletion miphun pawl ih hrem nak sungin an pahnih cu thinglamtah ah an khen ih an luu an tan. Nat nak tampi hlo ter nak thawn peh par mi mangbangza ralrin nak pek tu pawl cu an mah tin an run theih ter. Minaa pawl ih zaanmang ah veikhat veihnih an lang ih cui mina pawl sii tla an pek.
Cumi lakin ramuk tu a hmaisabik siangpahrang Justian tla a tel. Rome ih biakinn tel in an pahnih sunlawih nak ah a tamzet mi Biakinn pawl an rak sak.
Mithianghlim Cosmas le Damian cu sibaw pawl kilkawi tu tin pawlpi ih a nemhnget bangin kan nih khal kan thinlung, kan thlarau le taksa dam nak kan ngah thei nak dingah le sibawi pawl hrangkhal ah Pathian kutcak lang in mina pawl damter nak an nei sinsin theinak dingah thlaza cam tlang uhsi.
