Pope Leo in October sung Remdaihnak hrang nitin Rosary cam dingah zumtu pawl sawm.

Pope Leo XIV in October thla sung nitin Rosary cam dingah zumtu pawl hnen a sawm ih Bawinu Maria upat sunloihnak Jubilee a sivekin October 11 ni cu St. Peter tualrawn ah Rosary thlacam dingah le Pathian ih remdaihnak thlasuah dil dingah a rak than.

Leitlun thawn pehpar mi Catholic Pawlpi cu thianghlim Rosary hnen ap mi a si vekin a thupi bikin October thla sung cu ralbuainak hmunram pawl ah remdaihnak hrang lungrual ten Rosary thlacam dingah a rak sawm.

Pope XIV in Thawngkai nithum ni mipi a tonnakah a rak than. Amah in October 11, 2025 zanlam 6:00 pm ah St.Peter tualrawnah Rome ih a um mi zumtu pawl pumkhawm dingah a rak sawm. A ralai ding mi thla ah nitin ten remdaihnak hrang Rosary cam dingah bulpak in siseh, innsungsang in siseh, pawlkom in siseh mitin ka lo sawm tiah a rak sim.

Cun Pope in October thlasung zanlam 7:00 pm ah St.Peter tuanrawn ah Rosary thlacamnak nitin nei dingah Vatican ih riantuan tu pawl khal a rak sawm. Portuguese khawmzawh tu pawl cibai buknak a nei ih Pope in huatawknak ruangih a siatral mi pawl hrangah a riahsiat thu khal a rak sim.

A mah in Chirstian pawl hnen “minung pawl kha tleunak pe in a khaisang tu Jesuh Khrih ih duhdawtnak” kha midang hnen khalah zemve dingah a rak sawm.

Remdaihnak hrang Rosary cu Jubilee of Marian Spirituality tuah sungah a si ding ih cu mi cu October 11 -12 ni ah a si ding. Cui ni cu 1962 October 11 ni ah Pope St. John Paul XXIII ih a rak on mi avei hnihnak Vatican Council ih kum 63 kim hngilh lonak ni khal a si. Our Lady of Fatima (Fatima Bawinu Maria zuk) a thokih sin um mi zuk cu Jubilee of Marian Spirituality le Rosary camnak ah St. Peter tualrawnah tar a si ding.

Hi thuthang cu Vatican thuthang in a remcang le a tawi zawngih kan ngan mi a si.