Mina Hriak Culhnak Sacrament
313. Baibal Hlun sungah natnak cu ziang tivek in an hmu?
Baibal Hlun sungah natnak cu tha nemnak le sualnak ruangah a si tin an hmu a si.
314. Mina pawl hnenah Jesuh in ziangtin zaangfahnak a nei?
Jesuh in mina pawl zaangfahnak a neihnak le mina pawl a dam ternak in Pathian ih Uknak Ram cu Jesuh hnenah a um a si timi fiang ten a lang ter. Cun sualnak, harsatnak le thihnak a neh zo tinak khal a khih hmuh a si. Jesuh in a maih zonzaihnak le thihnak in milai ih kan zonzaih le harsatnak ih ti can a lang ter. Milai in zonzaih harsatnak cu Jesuh ih zonzaihnak le harsatnak thawn kan kom a si le cuih milai ih zonzaih harsatnak cu kan maih hrang le midang ih hrangah thianhlimnak le rundamnak ngahnak ding hrangah a cang thei.
315. Pawlpi in ziangtivek in mi damlo pawl a kil khawi?
Bawipa ih hnen ihsin Pawlpi in midam lo pawl damnak ngah thei dingin ṭuanvo a ngah bangtuk in Pawlpi in mina pawl cu thlacamnak thawn a kil khawi. Pawlpi cu mina pawl hrangah sacrament khal a si. Hi sacrament cu Khrih ih tuah mi a si. Himi sacrament thawn pehpar aw in mi thianghlim James in hi tin a sim: “Nan lak ah mina nan um maw? Pawlpi ih siangbawipawl ko hai sehla thlacamsak hai seh. Cun Bawipa ih hmin in hriak culh hai seh” (Jeim 5:14-15).
316. Zo pawl in Mina Hriak Culhnak sacrament an co thei?
Damlonak ruangah siseh, kum upatnak ruangah siseh a thi zik mi (Catholic) zumtu pohpoh in hi Hriak Culhnak sacrament cu an ngah thei a si. Hi sacrament cu a ṭul dandan in vei hnih vei thum tiangkhal mi pakhat in ngah theih a si. A cang thei a si le Hriak Culhnak tuah hlanah bulpak sualthlahnak tuah ding a si.
317. Mina Hriak Culhnak sacrament cu zo in a pek thei?
Mina Hriak Culhnak sacrament cu Bishop pawl le siangbawi pawl lawng in an pek thei a si.
318. Mina Hriak Culhnak sacrament cu ziang tin pek a si?
Bishop ih thlawsuah pek mi sahriak thawi culhnak cu a thupibik a si. Midam lotu ih cal le kut ah culh phah in mina hrangih thlacam sak a si.
319. Mina Hriak Culhnak sacrament ih ṭhatnak pawl cu ziang an si?
Hriak Culhnak sacrament in midam lotu cu Khrih ih zonzaihnak thawn a pehzom aw terih a maih hrang le mizapi hrangih ṭhatnak ding hrangah a hleice mi zaangfahnak laksawng a co ter. Hi sacrament in mina cu hnangamnak, remnak le daihnak, ralṭhatnak le sual ngaithiamnak a ngah ter. Pathian ih rem a tiah cun tisa damnak khal an ngah thei. Ziang khal a si le hi Hriak Culhnak sacrament in midam lo tu cu Pa ih inn thleng thei dingin tim a tuah sak a si.
320. Viaticum timi cu ziang so a si?
Viaticum kan timi cu mi thi zik pawlih an san mi Missa khi a si. A thi ih a thosal tu Khrih ih taksa le thi a co tu hrangah hi Missa cu kumkhua nunnak hrangah le thawhsalnak ih cahnak huham hrangah thlaici a si.
Riannak le Thuthangṭha Sacrament
321. Riannak le thuthangṭha hrangih sacrament cu ziang an si?
Riannak le thuthangṭha hrangih sacrament cu Siangbawi Cannak le Ṭhitawknak an si. Himi sacrament pahnih in Pawlpiih thuthangṭha phuannak ah mi riannak le Pathian ih milai finkhawmnak ding hrangah zaangfahnak laksawng an nei. Pawlpi ṭhansonak ding hrangah le milai rundamnak hrangah hi sacramement pahnih cu Pawlpi in a nei.
