Nauhak million khat in Oct. 7 ni ah leitlun remdaihnak hrang Rosary cam ding.
September 23, 2025
The pontifical foundation of Aid to the Church in Need (ACN) in nauhak million khat kom khawm in leitlun remdaihnak hrang Rosary thlacamnak tumtahnak a vei 20nak cu October 7, 2025 ah tuah dingin kan dung reilo te ah simthannak an nei.
Aid to the Church in Need (ACN) in nauhak million khat komkhawm in Rosary thlacamnak tumtahnak cu a vei 20nak a si thu sim thannak an neih hnuah tuikum hrangih tumtah mi cu thentheknak, doawknak le ralbuainak ruangah hliam tuartu kan leilungpi ah lungrualnak le remdaihnak a um theinak ding hrang thlacam dingah asi.
2005 October 18 niah Venezuela ram ih khuapi Caracas tualrawn tluanah zumtu hrekkhat pawlkom pakhat in nauhak pawl le mino pawl an finkhawm ih Rosary thlacamnak an rak tuah. Thla an cam lai ah nauhak pawl ih kut ah a tleu mi a phutte an rung tla in an hmu ih zumtu hrekhat pawl in vancung in langnak a si tiah an ti ih Pawlpi ah hi thlacamnak karhzai ter dingah an rak forhfial.
Cu mi thlacamnak an theh hnuah cui pawlkom pawl cu an mai ruahnak kha Venezuela National Conference ah an thun lut ih cui an thlunlut ihsin thokin an tuah ding daan pawl kha ramsungih Cazirnak Tlawng pawl le Biakinn pawl ah biaknak lam pawlkom pawl hmangin langsar dingin timtuahnak an nei cih tiah hi mi tuahnak ih general coordinator a si mi Ayeila Bello in a rak sim.
Cui sithok in hi mi tuahnak ih tumtah mi cu ‘nauhak pawl le mino pawl in Christian ih manhlat zia le Catholic Church ih thlacam biakthawinak tuah daan ihsin hmang thiam ding ih tumtah nak thawn tuah peh mi asi tiah a sim.
ACN ih bomnak in hi tumtahnak cu leitlun hmun kip ah nuam te ten a karh vivo ih hi mi ih ruahnak petu Fr Anton Lasser cu leitlun hmunkip ih zumtu pawl hnen October zarh hmaisa bikah thlacam tlang dingah a rak sawm ih a hleice in Oct 7 ni Our Lady of the Rosary ( Rosary Siangpahrang Bawinu) puai ni ah tamdeuh in thlacamnak ah tel dingah a rak sawm.
Cui tlunah a mah in nauhak pawl ih an zumnak ihsin a ra mi leitlun huap thlacamnak ni sunglawi cu thehdarh dingah khal a rak sawm. Nauhak pawl ih thlacamnak cu Pathian hmaiah hmuar a nei ih cui hmuar in phar pawl hman thlak ter theinak a neih vekin hriamhma pawl khal a dam ter thei ih thimnak in tleunak ah a keng ter thei a si tiah Lasser in a rak sim.
International ACN ih President a si mi Cardinal Mauro Piacenza khal in hi tumtahnak ih thu pit zia kha a hleice in remdaihnak le lungrualnak hrang leilungpi ih tul mi kha sawhkhih in pehbet in ruat cio dingah a rak sim. Tuisan ah thlacamnak aw cu a dai leitlun pi buainak aw ruangah a tamsawn cu hrial a tong nan Rosary cu remdaihnak lam ah in hruaitu pakhat asi ih cu mi cu a daizet nan hmuar a nei ih Khrih ih Thuthangtha thawn a nai bik mi lamzin pakhat a si tiah a rak sim.
“Lungrual ten thlacam tlang uh si” Pawlpi sungah duhdawtnak le tuahnak pawl thawn din mi pehtlaihnak hnget ter dingah le thianhlimnak thawn a tlaitluang mi duhnak mino pawl ih thinlung ah Thiangthlarau ih thangphoknak an ngah theinak dingah thlacam tlang uh si tiah pehbet in a rak sawm.
Hi mi tumtahnak ah tel a duhtu pawl cu campaign website ah cazin pek a thei ah a sim. Hi mi ih sungtuan pawl khal in caanserh ah nauhak pawl ziangzat an tel thei ti mi thei felnak ah pawlkom dinhmun in cazin pe dingah tha an pek thu ACN in a rak tarlang.
Hi mi cu Catholic News Agency thuthang in a tawi zawng le a famkim thei bik in kan ngan mi asi. Kan thuthang a rak siartu le tha in petu zate parah Pathian thlasuahnak um hram seh.
