295. Ziangruangah Khrih in Sualthlahnak sacrament le Mina Hriak Culhnak sacrament a tuah?
Kan ruang pumpi le thlarau hrangih damnak sibawi a si mi Khrih in Sualthlahnak le Mina Hriak Culhnak sacrament pawl a tuah a si. Ziangruangah tile Tihnimnak, Christmas Thapeknak le Missa sacrament pawl ihsin in pek mi nunthar cu sualnak ruangah a tha a nau thei lawng siloin a hloh khal a hlo thei a si. Curuangah harhdamnak le rundamnak hnaṭuan cu hi sacrament pahnih in Pawlpi in ṭuan seh tiah Khrih in a duh.
Sualthlahnak Sacrament
296. Sualthlahnak sacrament in ziang hmin pawl a nei?
Sualthlahnak sacrament cu:
(1) Sualsirnak sacrament;
(2) Sualthlahnak sacrament; le
(3) Piantharnak sacrament tiah kan ko.
297. Ziangruangah Sualthlahnak sacrament cu Tikholhnak sacrament ṭheh hnuah a ra?
Tikholhnak sacrament kan ngah laiih kan ngah mi zaangfahnak laksawng in thanaunak le famkim lonak thawn a khat mi milai sinak cu a hlo ter lo. Cun sualnak tuah duhnak khal a hlo ter cuang lo ruangah Khrih in Sualthlahnak sacrament cu a tuah a si.
298. Khrih in ziangtikah Sualthlahnak sacrament a tuah?
Thihnak ihsin a thosal tu Bawipa in hi Sualthlahnak sacrament cu Thawhsalnak zanah amah le amah a dungthluntu pawl hnenih a lang caanah a tuah a si. Bawipa in hitin a dungthluntu pawl cu a sim: “Thiang Thlarau co uh. Miih sualnak nan thlah a si le an sualnak cu thlah a si ding; miih sualnak nan thlah sak lo a si le, an sualnak thlahsak an si lo ding” (Johan 20:22-23).
299. Tikholhnak a ngah tu pawl in piantharnak an ṭul maw?
Khrih ih kawhnak aw cu tikholhnak a ngah tuih nunnak ah cat lo bang loin a um ringring. Pianthar nak cu Pawlpi zaten in an ṭul ringring a si. Pawlpi cu a thianghlim a si. Asinan, Pawlpi sungah sualnak neitu an um.
300. Thinlung sungih sualsirnak kan timi cu ziang so a si?
Thinlung sungih sualsirnak kan timi cu Pathian ih duhdawtnak thungrul dingin “sual sirnak thinlung” (Psalm 51:19) ih cangvaihnak a si. Himi cangvaihnak ah sualnak pawl hrangih sualsirnak, hmai lei ah ka sual nawn lo ding a si, tiah hnget khoh zet in tumtahnak neihnak le Pathian rinsannak pawl an tel a si. Pathian ih zaangfahnak hnenih zumnak in tha a khoh ter.
301. Sualsirnak cu ziang vek in kan lang ter thei?
Sualsirnak cu phun tampi in kan lang ter thei. A hleice in sualsirnak cu rawl ei supnak, thlacamnak le peknak in kan lang ter thei a si. Himi pawl le a dang sualsirnak pawl cu nitin in Khristian nunah, a bik in, Vua caan (Lent) sungah le tlawngkai ni nga ni pawl ah kan tuah thei a si.
302. Sualthlahnak sacrament ih a thupibik mi tuah ding pawl cu ziang an si?
Sualthlahnak sacrament ah a thupibik mi tuah ding pahnih an um. Cu mi pahnih cu:
- (1) Sualthlah tu ih sual cawhkuannak a tuah mi le
- (2) Khrih hmin in sual a thlah sak tu siangbawipa ih sual thlahnak le sual cawhkuan peknak pawl an si.
301. Sualthlah tu in sual a thlah tikah ziang mi pawl a tuah a ṭul?
Sualthlah tu in sual a thlah tikah:
(1) Ṭhazet in amah le amah ziang sualnak pawl ka tuah a si tiah a thinlung sung in a zawihnit aw ding;
(2) A sual a sir dingih hmai lei caanah ka sual nawn lo ding a si timi tumtahnak khal a nei ding;
(3) A sualnak pawl cu siangbawi hnenah a phuang ding;
(4) Siangbawi ih sual cawh kuannak a pek mi ṭhaten a tuah ding.
304. Ziangvek sualnak pawl cu siangbawi hnenah phuan a ṭul?
Siangbawi hnenih thlah dah hrih lo mi sualpi pawl hmuahhmuah pawl siangbawipa ih hnenah phuan tengteng ding a si.
305. Ziang caan ah sual thlah tengteng a ṭul?
Tikholhnak a ngah ih ruahnak pitling a nei zo tu pohpoh in kumkhat sungah a malbik in veikhat sual thlah a ṭul a si. Cun Missa san hlan khal ah a hleice in sualpi a neih a si le sual a thlah a ṭul a si.
306. Ziangruangah sualte pawl khal sual thlah a ṭul?
Sualte pawl khal sual thlah dingin Pawlpi in na zet in tha a pek a si. Ziangah tile sualte pawl kan thlah tikah ruahnak ṭha ruat dingin le ṭhat lonak pawl pial thei dingin in bawm a si. Khrih in damnak in pe ih Thlarau nunnak sung khalah in ṭhang ter a si.
307. Sualthlahnak sacrament cu zo in a pe thei?
Khrih in sual thlahnak tuahnak cu a dungthluntu pawl hnenah a pe a si. Cumi sual thlah theinak cu dungthluntu pawl ai awh tu bishop pawl le an mah bawmtu siangbawi pawl hnenah pek sin a si. Sual thlah theinak huham cu Pa le Fapa le Thiang Thlarau ih hmin in an tuah a si.
308. Hrek khat sualnak pawl cu zo pawl lawng in thlah sak a si?
Hrek khat sualpi, ṭhimnak ah, Pawlpi ihsin dawi mi sualnak tivek, pawl cu Pope le Bishop lole ṭuanvo an pek mi siangbawi pawl lawngin an thlah thei a si. Asinan, thih zawng te ah cun zo vek siangbawi khal in ziangvek sualnak khal an thlah thei a si.
309. Siangbawi pawl in an thlah sak mi sualnak phuan a thei maw?
Siangbawi pawl in an hnenih phuan mi sualnak pawl cu ziang tik hmanah an phuang thei lo. An phuang pang a si le na zet in cawhkuannak pek an tong thei a si. Curuangah siangbawi pawl in an hnenih sualthlah tik ih mi ih sim mi le phuan mi sualnak cu ziangtik hmanah an phuang sal thei hrimhrim lo a si.
310. Sualthlahnak sacrament ih ṭhatnak pawl cu ziang an si?
Sualthlahnak sacrament ih ṭhatnak pawl cu:
(1) Pathian thawn remawknak an nei ruangah sual ngai damnak;
(2) Pawlpi thawn rualrem awknak;
(3) Zaangfahnak laksawng, a hlo pang a si le, ngah salnak;
(4) Kumkhau sual cawhkhuan ihsin luatnak;
(5) Thinlung daihnak le thlarau hngangamnak;
(6) Khristian nunnak ih a thupi zet mi thlarau thazang ngahnak pawl an si.
311. Miburpi sual thlahnak le miburpi sual thlasak nak tuah theih a si maw?
A thupi tuk le a ṭul tengteng, ṭhimnak ah thihnak a thleng zik tivek, caanah cun Pawlpi ih zirh daan thlun in le caan a rem veten bulpak ih sual thlah dingin tumtahnak a um a si le miburpi sual thlahnak le miburmi sual thlahsaknak tuah theih a si.
312. Indulgences kan timi cu ziang an si?
Indulgences kan timi cu, sualnak thlah sak zomi, Pathian ih hmai ah sual cawhkuannak ngai damnak timi a si. Indulgences cu Pawlpi ih hnaṭuannak in Khrih le mi thianghlim pawl ih ṭhatnak in ngah theih a si.
