Kawlram Bishop pawl in mipi pawl harsatnak ruangah sahimnak ding lawng an hawl tiah sim.
September 21, 2025 RVAFalamservice
Kawlram, Rakhai State ah sual nei lo mipi pawl ralbuainak a sosang tuk ruangah harsatnak an tuart hu Pyay, diocese ih Bishop Peter Tin Wai in riahsiatnakk thawn a rak sim.
Vatican thuthang a si mi News agency Fides ih simnak ah Kawlram nitlaknak lam zate zik in ralbuainak ruangah mipi pawl pehzom in harsatnak an tongih minung nunnak khal tampi a cem thu an dinhmun ngaihsak in a rak tarlang.
Kawlralkap pawl in Sep 12 ni ah Kyauktaw khuapi ih private Tlawng pahnih kha vanzam thawn tuahmawhnak a tuah ruangah kum 15 in 21 karlak minung 20 nunnak an liam tiah a rak tarlang.
Rakhai State nisuahnak ramri lam khal ah nasa zet in ral buainak a um rero. State hmun tam sawn ah Arakan Army in a uk ih Kawlral kap pawl thawn doawknak pehzul rero asi thu Bishop in Fides thuthangah a rak sim. A tu ah cun AA pawl in khuapi 17 sungah 14 a rak uk thei.
Fides thuthangih simnak ah uk mi ram a sungtu Kawlralkap pawl in vanzam tampi hmangin an doawknak ah mipi pawl ih inn tel in a siatsuah a si.
Kawlram Bishop pawl in riahsia zet in an simnak ah hmun tamsawn ah pehtlaihnak pawl phihsak an tuar ih fimzirnak khalah harsatnak an ton vek in mipi pawl khal sahimnak ding lawng ruat in an zuam thu a rak sim.
Zumtu minung 30000 hrawng a um mi diocese sungih Parish 12 tel in cui hmunsungah mission hna an tuan thu Bishop in a rak sim.
Puithiam pawl cu mipi pawl thawn naizet in an pehthaih aw ih nitin harsatnak pawl lakah sahimnak dingah an zuam rero a si. cuitlunah Missa raithawinak tuah thei dingah Biakinn pawl khal ong thei dingah thupit in an tuah thu a rak sim.
Diocese sungih mipi hrekkhat pawl cu Rakhai (AA) pawl ih uknak sungah an um ih a hrek khat pawl cu Kawlralkap pawl ih uknak hmunram sung Siitwe, Kyaukpyu le Munaung khupi pathum ah an um thu a rak sim.
Ralbuainak dinhmun ruangah um hmun thawn rero si thu riahsia zet in a rak sim. Harsatnak ruangah sahimnak hrangah Yangon lole Pyay ah an thawn. Cuitlun ah Rakhai ah in, ei ding a har ih fimzirnak le harhdamnak tuamhlawmnak pawl khal a daih lo thu a rak sim.
Curuangah innsang hrek khat pawl cu fimzirnak ding ruat in um hmun thawn dingah an zuam thu khal a rak sim bet.
A tu caan ah cun Mawhnei lo mipi pawl cu ral kap kaphnih karlak ah phih an tuar ih mino pawl ralkap tuan dingah “hramhram in an fial” thu khal a rak sim fiang.
Curuangah mino tam sawn cu ramdangah an tlan ih minung pawlkom pawl cu a tha bik mi thazang pawl an sun thu riahsia zet in a rak tarlang. hi mi cu Vatican thuthang in a remcang dan in kan ngan mi asi.
