Thuthangtha simtu – Saya John No Mang
Caantluang Zarhkel (24) nak, Nihnih Ni,
September 16, 2025
Lk 7:11 -17, 13 nak Bawipa in cunu cu a hmuh tikah a zaangfah ngaingaih “Tap nawn hlah” tiah a ti.
Tah hlah 2:11 “Ka tah nak ah ka mit a cur theh. Ka don har nakah ka thin a pit, ka minung pawl van duai an ton ruangah” a ti. Israel pawl tlan uh an ti, tlun inn an tong lo. Tah 5:4 “Tidai kan lei a tul ih zanthing a man kanpek a tul”. Hihi Israel pawl BC 586 Jerusalem siat tumih an tuar thu a si.
Tui kan ram dinhmun khal hi, vonsim lole von rel lo khal a theih lo. Mai inn siat thluh um nak nei nawn lo. Mihnen va pan ih tidai le zanthing meihol man pek tuk, innsan man a si ah, cuitlunih fa le te ral ih thah tong rero bet. Thil le ri cem thluh si hi! Ruah rero ah zo saw tap lo in a tuar thei ding.
Asinan maw, asinan maw thlarau lamin kan hnem aw ton pei uh. Tui kan siar mi Bible ca tlang cun tap nawn hlah uh, in ti. Ram le miphuh hrangih nunnak liam kan fa te nau pawl khal lungawinak thawn an khat leh ding hokhaw. An taantak mi nu pa le unau rualpi tha pawl tap duh rero nawn hlah uh. Inn nei lo pawl khal van ah kut ih sak lo mi inn kan nei in ti kha. Cun fa le te nei lo khal tap rero hlahuh. Cui ni ah cun naute ih pawhfawh lo mi nu cu mi lungawi a si ding a ti kha! Rachel khal na fa ngaiin tap duh nawn hlah, na fate mithianghlim ih a can zo kha!
Ka riah siat nak cu lungawiih laamnak ah I thleng sak (Ps 30:11). Is 65:19 “cu tawkah cun tah nak a um nawn lo ding”. Thup 21:4 “An mitthli hmuahhmuah a hnul sak ding. Thih a um nawnlo ding. Ninghang riahsiat, aihram tahnak le nat nak a um nawn lo ding”.
Unau, taksa thil thu ih ziangtluk harsat, mangbang, vansan, tah kan ton hmanah hnem tu tha Pathian kan nei. Riahsia ninghang in tahduh nawn hlah uh. Amen.
