271. Missa timi cu ziang so a si?
Missa timi cu Bawipa Jesuh ih Pumpi le Thisen sumnak a si. Himi cu Bawi Jesuh in thawm huham thawn hi leitlun ih a ra kir sal hlan tiang hmun ringring dingin a tuah mi sacrament a si. A thihnak le thawhsalnak hngilh lonak cu a Pawlpi a ap a si. Missa cu pumkhat sinak langternak a si-ih duhdawtnak ih thuthiam mi khal a si. Missa kan san a si le Khrih saang kan siih kan thinlung cu zaangfahnak in a khat. Cun Missa cu hmai leiih a ra lai ding mi sunlawinak ih tiamkamnak khal a si.
272. Ziangtikah Jesuh in hi Missa sumnak cu a tuah?
Thianghlim Tlawngkai Nili zan lole a ral pawl kut sungih “zuarnak a tuar zan” (1 Korin 11:23) ih a dungthluntu pawl thawi zanriah an ei caan ah, Jesuh in hi Missa sumnak sacrament cu a tuah a si.
273. Ziangtin Jesuh in Missa sumnak cu a tuah?
Jesuh in a dungthluntu pawl cu hmunkhat ah a ko khawmih sangreu cu a lak. Cun a phel ih a dungtluntu pawl cu a pek ih hi ti in a sim: “Nan zaten himi cu lak uh la ei uh; himi cu nan maih hrangih peknak a tuar ding mi ka Pumpi a si”. Cun sabit hai cu a lakih hi tiin a sim: “Nan zaten himi cu lak uh la in uh. Himi cu ka Thi hai a si. A thar le kumkhua ih a hmun mi thukamnak Thi a si. Sualnak pawl thlah saknak ding hrangah nanmah le mi tampi hrangah thletnak a tuar ding mi a si. Keimah hngilh lonak dingin tuah uh”.
275. Pawlpi ih nunnak ah Missa cu ziang tivek in a thupi?
Missa cu Khristian nunnak ih hrampi le thupibik a si. Pathian kan biaknak ih a sanbiknak le a thupitbik nak cu Missa sumnak sungah a um. Missa sumnak sungah Pawlpi ih thlarau nunnak a tel ṭheh a si. Thlarau nunnak le Pathian ih fate le pawl ih pumkhat sinak cu Missa sumnak in a langter ih a hnget khoh ter sinsin a si. Missa sumnak kan tuahnak in vancung ramih sunlawinak thawn kan peh zom awih kumkhua nunnak khal kan tep a si.
276. Missa cu ziang hmin dang pawl in kan ko thei?
Missa ih famkimnak cu hmin phun dangdangih khawhnak in a lang fiang ter a si. Hi sacrament ih hmin pawl tla cu:
(1) Bawipi ih Thi le Sa
(2) Thianghlim Missa
(3) Bawipa Zanriah
(4) Sang Phelnak
(4) Missa Sumnak
(5) Bawipa ih harsatnak, thihnak le thawhsalnak ciinnak
(6) Thianghlim Sumnak
(7) A Thianghlim mi Pathian Sumnak
(8) Thianghlim Mangbangza
(9) Biakṭheng ih a Thianghlimbik mi Sacrament le
(10) Thianghlim Bawipa ih Thi le Sa tla an si.
276. Pathian ih rundamnak timtuahnak sungah Missa cu ziang tivek din hmun ah a um?
Isarel pawl Egypt ram ihsin an luatnak cu thilnu tel lomi sangin hngilh lonak ih an tuah mi cu Missa sumnak in a lang ter a si. Jesuh ih thu a zirh tikah Missa thu a rak sim cia ih a dungthluntu thlei hnih pawl thawn a netabik zan riah an ei tikah Missa Sumnak Sacrament cu a tuah. Curuangah Pawlpi in Jesuh ih thu zirh mi cu a tlun ih Missa sumnak cu a hleice in Nipi sun ah a tuah ringring a si.
277. Ziang tivek in Missa sumnak cu tuah a si?
Missa sumnak cu ṭhen hnih ih ṭhen theih a si nan sumnak pakhat a si. Ṭhenkhatnak cu Pathian thuthangṭha simnak le ngainak a siih a pahnihnak cu sang le sabit hlannak le sumnak a si.
278. Missa thawinak cu zo in a tuah thei?
Missa sumnak cu Bishop lole siangbawi lawngin tuah theih a siih Pawlpi ih hmin in le Khrih sungin tuah a si.
279. Missa sumnak tuah tikah ziang thil pawl a thupibik?
Missa sumnak tuah tik ih a thupibik mi thil pawl cu sang le sabit ti an si.
280. Ziang tivek in so Missa cu Khrih ih sumnak ciin ringringnak a si?
Missa sumnak cu ciin ringringnak a si. Ziangruangah tile mi zakip ai awh in Khrih in thinglamtah par in a Pa ih hnenih a sumnak cu a ngaingai in a um ter a si. Missa sumnak sungah, “Himi cu nanmaih hrangih peknak a tuar ding mi ka Pumpi a si” timi le “Himi cu thukam thar ih nanmaih hrangih thletnak a tuar ding mi ka Thi hai a si” (Luka 22:12-20) timi a thupibik. Thinglamtah sumnak le Missa sumnak cu a bang aw mi sumnak pakhat an si. Puithiam le sum mi cu an bang aw. Sum daan lawng a dang. Thinglamtah parih sumnak ah cun thi a tel. Asinan Missa sumnak ah cun thi a tel lo.
281. Ziang tivek in Pawlpi cu Missa sumnak ah a tel?
Missa sumnak sungah Khrih ih sumnak cu a ruangpi sungih a tel tu pawl ih sumnak ah a cang ve. Zumtu pawl ih nunnak, thangṭhatnak, harsatnak, thlacamnak le hnaṭuannak pawl cu Khrih ih ta thawn an kom aw a si. Mithi le minung zaten ih sualnak ngaidamnak ding hrangah le Pathian hnen ihsin thlarau le lei laksawng ngahnak ding hrangah Missa sumnak tuah a si. Vancung ramih Pawlpi khal Khrih ih sumnak thawn an kop aw.
282. Ziang tivek in Khrih cu Missa sungah a um?
Tahṭhim theih loin Khrih cu Missa sungah a um a si. Khrih cu Missa sungah a Pumpi, a Thi, a Thlarau le a Pathian sinak in a dik le a ngaingai in a um a si. Curuangah Khrih cu sang le sabit sungah a um a si.
