244. Sumnak tuahnak ding hrangah Pawlpi in hmun neih a ṭul maw?

Khrih cu Pathian umnak biakinn ngaingai a si ruangah Thukkham Thar ih “thudik le thlarau” (Jn 4:24) sungih biaknak cu khi tawk ah lole hi tawk lawngah tuah ding a si, tivek ih ti a thei lo. Khrih ruangin Khristian zate le Pawlpi pumpuluk cu Thiang Thlarau ih cangvaihnak ruangah a nung mi Pathian ih biakinn ah an cang. Sikhalsehla, Pathian ih milai pawl cu leitlun ih an um lai ah cun hmunkhat ten sumnak tuahnak hmun a ṭul a si.

245. Thianghlim inn cu ziang pawl an si?

Thianghlim inn kan timi pawl cu Pathian ih inn an si. Thianghlim inn cu thlacamnak hmun an siih Pawlpi in Missa sumnak a tuah. Cuih hmunah Khrih cu biak a siih Missa bawm (thingkuang) sungah Khrih cu a ngaingai in a um.

246. Biakinn thianghlim sungih hmun thianghlim pawl cu ziang an si?

Thianghlim cabuai, Missa kuang, thianghlim hriak pawl retnak, bishop lole tlangbawi tohkham, baibal siarnak, tihnimnak kuang, sualthlahnak hmun pawl cu biakinn thianghlim sungih a um mi hmun thianghlim pawl an si.