241. Sumnak caan lak ih a thupibik caan cu ziang a si?
Sumnak caan ih a thupibik caan cu Nipi ni a si. Nipi ni cu sumnak caan pumpuluk ih hrampi le muril a si. Kumkhat sungih sumnak caan ih thupibik nak cu, puai hmuahhmuah ih puai a simi, Thosal puaipi (Easter) a si.
242. Sumnak kum ih hnaṭuan cu ziang a si?
Sumnak kum sungah Khrih ih mangbangza thuthuk cu Khrih in milai cannak a laknak ihsin thok in thawm huham thawn a rat sal tiang Pawlpi in a tuah a si. Pathian ih Nu thiangthlim Mary khal Pawlpi in a cuangce mi duhdawtnak thawn upatnak a pek a si. Khrih hrangih a thi tu, Khrih thawn zonzaih a tuar tu, Khrih thawn sunlawinak sungih a nung tu mi thianghlim pawl hrangah khal, Pawlpi in hngilhlonak puai a tuah ringring a si.
243. Pawlpi ih nitin Thlacamnak cu ziang ti can a si?
Pawlpi ih nitin thlacamnak kan timi cu Khrih le a Pawlpi ih thlacammi a si. Pawlpi ih nitin thlacamnak ruangin Khrih ih mangbangza thuthuk in cat loin ni pumpuluk cu a thianghlim ter ih a thlengaw ter ringring a si. Pawlpi ih nitin thlacamnak ih cammi pawl cu Saam, Baibal le Pawlpi ih pa le thlarau saya pawl ih ngan mi pawl an si.
