236. Ziangvek in sumnak tuah a si?
Sumnak sungah hminsinnak tampi a tel ih an ti can cu sersiamnak le milai nunphung ah hrampi an nei. Cumi pawl cu Khrih ah le Khrih ih hnaṭuannak sungah famkim ten phuan le langter a si.
237. Khawitawk in sacrament ih hminsinnak pawl an ra?
Hrekkhat sacrament ih hminsinnak pawl cu sersiam mi pawl (ṭhimnak ah, tleunak, tidai, meisa, sang, wine, siti tivek) in siseh, hrekkhat pawl cu milai nuntu zia (ṭhimnak ah, khawlhfainak, hriak culhnak, sang phelnak tivek) in siseh an ra a si. Cun a dang hrekkhat pawl cu Thukamnak Hlun ih rundamnak thuanthu sungih (lantak puai thawhdan, thawinak, kutsuannak, apnak) pawl in a ra mi an si. Hi hrekkhat hminsinnak pawl cu thlengtheih lo an si. Khrih in a hmang hai ih rundamnak le thianhlimnak hrangih thuthangṭha phurtu ah a tuah hai.
238. Sacrament tuah tikih cangvaihnak le ṭongfang pawl in ziangtin pehpar awknak an nei?
Sacrament kan tuah tikah cangvaihnak le ṭongfang pawl cu naih aw zet in pehzom awknak an nei. Sumnak ih hman mi ṭongfang pawl in sacrament tuah caan ih cangvaihnak pawl tel pi ih nunnak pek a ṭul. Biaktuahnak ih hman mi ṭongfang pawl le cangvaihnak cu ṭhen theih an si lo. Ziangah tile sullam nei mi hminsinnak an si ih an khihhmuh mi cu a ngaingai in an cang ter a si.
239. Ziang tivek in hlasaknak le awnmawi cu sumnak tuah tikah kan hmang thei?
Hla le awnmawi cu sumnak ih cangvaihnak thawn naih aw zet in pehzom awknak an neih ruangah ṭha ten upatnak pek a ṭul. Hla le awnmawi cu Catholic thurin thawn cafang le a thluk ah kalh awknak um lo ding an si. Baibal le sumnak cu hlafang le awthluk ih hrampi a si ding a thupi. Mawizet le ṭhazet in thlacamnak langter mi an si a ṭul. Awnmawi cu ṭhazet ih tuah ding a si.
Hla le awnmawi in sumnak ih a tel tu zumtu pawl cu thlarau thazaang pek thei a thupi zet. Hla le awnmawi in a sunglawi zet mi milai nunphung lang ter hai seh. Cuih hleiah a thianghlim le a thupi zet mi sumnak cu langfiang ter hai seh. Mi thianghlim Augustine in hi tin a sim: “Hla sak tu cu, veihnih thlacam a si.”
240. Thianghlim zuk/milem pawl in ziang mi ti can an nei?
Khrih ih zuk cu sumnak ih a ṭhazet mi zuk a si. Adang zuk pawl, ṭhimnak ah, Bawi Nu Mary le mi thianghlim pawl, in Khrih an khihhmuh a si. Ziangah tile Khrih cu an sungah thangṭhat le sunlawih a si. Zuklem pawlin Baibal thiangih thuthangṭha pawl an phuangih zumtu pawl ih zumnak an ṭhangphawk ih an karhzai ter a si.
