Mi aa pahnih cu zo an si?

Khua hlan laiah milian zet leiram neitu pakhat a rak um. Amah in fa pakhat a nei. A fapa cu innsang a nei ih mo mawite pakhat tla an nei. Nikhat ah a fapa cu thil zuar nak thu thawn khuapi pakhat ah a tlawng. An innah cun milian pai nupi le an mo lawng an tang. Zanlam ah an mo cu tidai bel a lu ah a suangih khua hnarpawn lamah tidai khai dingin a rak feh. An khuahar ih tidai khainak hmun in khua lam ih a kir laiah minung pali cu a lam hoi in an rat kha a hmu.

Pakhat in “ka naunu tidai malten in in ter aw” tiah a ti ih nunau nu cun “ ka u ka lo sut ding nang cu zo ha na si’’ kan nau nu kei cu khual tlang tu pakhat si tiah a ti ih nunau nu cun hni phah in “ hi leitlunah khual phun hnih a um, ka u nang cu ziangvek khual tlawng mi so na si tiah a rak sut. A suh tak cu ziang hman sawn thiam lo in a luu a kheu ih a tlan.

A dang pakhat in nauhak nu kei cu mifarah pakhat ka si. Tidai ka hal ih na ti malte in in ter aw tiah a ti. Nunau nu cun ka pu, mifarah khal ah phun hnih a um nangteh ziangvek mifarah so na si tiah a sut ih a pa hnihnak pa khal zianghman sang thiam lo in a tlan. A pathumnak pa cun ka nau nu kei cu fimnak neilo pakhat ka si zaangfah ten Tidai in do aw tiah a ti. Cu mi pa khal a hlan ta pawl vekin fimnak neilo khal phun hnih in a um nang cu ziangvek fimnak si na neih lo tiah a sut ih a pathumnak khal a beidong in a dangah a tlan sal.

Netabik pa cu khua dangtang phah in ka naunu tidai malten in in ter hram aw, kei cu mi aa pakhat ka si tiah a ti. Ka u at khal hi phun hnih in a um nangtah ziangvek phun so na si tiah a ti ih netabik pakhal zianghman sawn thei lo a tlan sal. Nunau nu in an zate theih dingin au phah in a sim. Lamzin a cemnakah innpi pakhat an hmu ding cui inn ah Ti nan in thei tiah a ti.

Nunau nu in cutiih a titheh veten lamzin tawizawng a zawh ih an inn ah zamrang ten a rak tlung. A rei hlanah minung pali pawl cu an inn ah an ra ih tidai in ding an dil. Nunau nu in an zaten innsungah a ko ih khuat thawn tha ten tidai a rak pek. Nunau in in a mitu te kha ka u le pawl tidai ka lo pek lonak cu tidai in nak hai ka ken lo ruangah ka lo in ter lonak a si tiah in ngai thiam uh tiah a ti.

Cui caan ah a pasal pa cu a lenglam in a ra tlungih inn ah mipa pali thawn ttong rero tu an mo kha a hmuh tikah “ aw nang cu pasal pawl thawn na nuam aw rero si lo maw? tiah a ti. An mo nu cun tuar a thei lo ruangah a sawn. Milian pa cun mihmai ih a sawn ruangah a lung a kim lo ih an zaten khua upa inn ah a ko ih thu rel dingin a sim. Khua upa inn an thlen hnuah “khuabawipa hi nunau nu hi ka fapa a um lo laiah innsungah mipa pali a ko ih hnih phah in a biak rero tiah a ti.

“ Nunau nu in an mah pawl cu khual tlawng mi an si ih tidai in dil tu pawl an si. Ka suh mi thusuhnak pawl an san thei lo ruangah hni pha in kan rel rero nak a si tiah a ti. Khuabawipa cun nunau pakhat dinhmun in pasal um lo sung innsungah a dang mipa ko theinak a um lo tiah a ti ih nunau nu in innsungah ka pasal ih nu a um. A mah nan sut thei. Kan tong men mi a si tiah a ti. Mipa pali pawl khal an suh tikah nunau nu ih a suh mi thusuhnak ruangah kan hnihnak a si tiah an rak let.

Ziang mi si a lo suh tiah a hmaisabik pa a suh tikah khualtlawng ti mi phun hnih a um, nangteh ziangvek so na si tiah ih sut tiah a let. Khual tlawng pahnih ti mi cu ziangso a si tiah a suh tikah nunau nu in leitlun ih khual a tlawng ringring tu pahnih cu Ni le Thlapi an si tiah a let. A dang pakhat in kei cu leitlun ah farah phunhnih a um thu in sut a ti ih nunau nu in farah phunhnih cu mo ti mi le Caw a si tiah a let. Ziangah tile cu mi pahnih cu midang an rinsan ruangah a si tiah a ti.

A pathumnak in kei cu fimthiamnak neilo tu phun hnih thu I sut tiah a ti. Cu mi cu ziangasi tile Tidai le Paisa an si ziangah tile Tidai le Paisa cu cathiam an tul lo an mai lamzinah an feh rero ih a hmangtu pawl ih zirin man an nei tiah a ti. Natabik pa cun kei cu mi aa ka si ka ti tikah mi aa phunhnih a um thu a sim. Nunau nu hnenih a phi an theih hlan te ah milian pa cu a ra kirsal. Nunau ..mi aa pahnih ti mi cu zo pawl an si tiah a ti. Ka sawn ko ding a hmaisa mi Aa cu ka innsang pai nu a si.

Ziangah tile thu hla zingzoi le theifel ta lo in a thin a heng theu ruangah a si tiah a ti. Apahnihnak ih mi Aa cu khuabawipa a si, sual a si lo mi, sualnak ah tuah in thu a sut rero ruangah a si tiah a ti. A rak zoh tu khuami pawl cu kut za beng in an hni. Nunau nu fimnak na nei a si tiah khuami pawl in an lawm ih an cawisang ciamco. ( hi mi thuanthu cu India thuanthu pakhat asi) hi thuanthu in ziang mi kan zir pei tiah ruat tlang uh si. Thuanthu kan ngan theu mi hi minung pawl cu thuanthu in zirnak kan ngah theu ruangah kan run tarlang mi a si. A rak siar tu zate hrangah Pathian thlasuahnak um hram seh.