August 28
Hippo khuapi ih Bishop a si mi Mithianghlim Augustine cu kum 354 ah saklam Africa ih Thagaste khuapi ah a rak suak. A nu in thla a cam sak rero nain a pa ih milem biak nak zum in le thlun in a rak thang lian.
Kum 17 a ti ah Katik khua ah a thleng ih cu tawk ah Manichaean ti mi milem biak nak ah hminsiat nak thawn thanglian mi a siih fa pakhat a nei. A kum 29 ah Italy ram ah a tlan. Cui hmun ah cun Milan Bishop Mithianghlim Ambrose ih a thu sim mi pawl cu a duh zet ih a rak upat zet.
A mah cu nikhat ah a innkiang ih nauhak pakhat ih hlasak awn a rak thei ih cu mi hnu a kiang ih um mi Bible cu kau in Mithianghlim Paul ih ngan mi catlang pakhat a rak siar. A siar mi cu “kan Bawipa Jesuh Khrih kha ralthuam vek in hruk uh; tisa duh nak le hiar nak pawl cu ban san thlang uh,” ti mi Rome 13:14 sungta a si.
Hi catlang in Jesuh Khrih hnenah a hruai ih a thinlung thleng ter tu khal a si. Kum 32 a ti kum 387 Pasca a thok ni ah Mithianghlim Ambrose hnen in tikholh nak a rak ngah. Cui sin thok in a nunnak cu Pathian hnenah ap ding in a bot cat.
A ca uk pakhat ah, “Hlanlai lawng ah si lo in ziangtik caan khal ih a tha ringring tu aw Bawipa, nang mah cu can rei hnu lawng ah ka lo duh” tin a rak ngan. Kum 395 ah Hippo khuapi ah Bishop a cang ih tuu khal tha le ca ngan thiam zet tu a si kha mi tampi in an run thei.
Nunau thianghlim pawl ih thlun ding mi daan pawl khal a rak ngah sak thei. A mah cu misenpi hnenah “Nan hrangah Bishop pakhat a si. A sinain nan mah thawn um tlang le cu pawlpi sungtel pakhat ka si ve” tiah a rak ti.
Nikhat ah Bawi thumkom Pathian thu a ruat lai ah tipi thuanthum ta tidai khai in tikap ih kua fate sungah a thun rero tu a danglam zet mi nauhak te pakhat thawn an tong aw.
Augustine in nauhak te hnenah a tuah mi a cang thei lo thu a sim tikah nauhak te in “na ruah nak in Pathin theih thluh na tumnak cun hi tipithuanthum ih tidai zate hi hi khur fate sungih thun ding hman a ol sawn tiah a rak sim.
Kum 410 ah Rome khuapi a tlaksiat hnu ah Augustine in “Pathian ih ram” tiah ca uk pakhat a rak ngan. Rome khuapi a tlaksiat nak hi Christian pawl ih sual nak ruangah si lo in Siangpahrang ih sual nak ruangah Pathian in cawhkuan in pek mi a si tiah a ca uk sungah a rak ngan. Hi a thiam zet mi Bishop cu kum 430 ah a um nak khua Vandals miphun pawl in an kulh ih an thawi that a si.
Mithianghlim Augustine hi a nun can ziaza tha lo pawl zaten hlon in Bawipai hnen ih a pan sal tikah leitlun thil hi ziang an si lo thu a thei ih Bawipai hrangah tha tho zetin tuantu a si vekin kan nih khal kan that lo nak pawl hlon le hrial in Bawipa a naih tu kan si theinak dingah thla in cam sak aw tin zaanfah bawm nak dil tlang uhsi.
