Mithianghlim Joseph Calasanz
August-26
Biaknak lam pawlpi tlawng pawl rak dintu Mithianghlim Calasanz cu kum 1556 ah Spain ram ih Aragon khuapi ah a rak suak. A nauhak lai ihsin a nunnak cu Pathian hrangah a hlan.
Nunau pakhat ih hnaihnok nak ihsin luat dingah Balansiwa University in a suak ih Acala khua ah biak nak lam thawn pehpar aw mi fimthiam nak lam ah a lut thok.
Kum 1583 ah Puithiam si nak a lak hnu ah Joseph in Christian nauhak pawl ih fimthiam nak a tul kha a thei suak. Kum 1592 ah Spain ram ihsin Rome ram ah a suak ih cu mi khuapi ih si nak a nei lo mi le ziang hman thei thiam lo mi mifarah pawl hrangah tlawng pakhat a rak din sak.
Cui hnu kum rei lo te ah nauhak pawl le mino pawl hrangih fimthiam nak lam ih a tumtah mi biak nak lam thawn pehpar aw mi tlawng a din sak.
Mithianghlim Joseph cu harsat nak le hmuhsuamnak pawl cu a thih tiang a tuar ih cu mi har nak pawl cu thinsau nak, tangdor nak pawl thawn a rak pah suak. Voikhat ah a hrekkhat mipi pawl ih relkhawm nak ruangah Joseph cu a si nak in an thlak ih misual tak bangin lamzin tlun ah hnuh a rak tuar.
Nehhnu ah a mah a nahsik tu Puithiampawl ih puhmawh nak ruangah a mah cu pawlpi thawn a pehpar aw mi khal tha ten a sim sal.
Pope in Joseph ih a din suak mi a mai pawlkom kha cawl dingih a ti tikah a mah in Pope hnenah “Pathian ih I pek mi thli pawl Pathian in a lak sal. Pathian hmin thangthat in um seh” tiah a rak ti.
A mah cu kum 1648, a kum 92 ah a din mi pumkhawm kha a din suak sal ih leilung pumpi ah a um rero lai a si.
Mithianghlim Joseph cu harsatnak, donak le nahsiik nak lak ah um hman seh la Bawipa ah a rinsannak cawl lo in a net tiang palai tha dinhmun ih a um thei bangtuk in, kan harsatnak le iiksiik nak phunkim kan ton caan ah thinnau lo in St. Joseph bangin kan din thei ve nak dingah a hnenah thla in cam sak aw tin zaangfah dil tlang uh si.
