August-25

France ram ih Siangpahrang Louis cu kum 1214 ah Poise khua ah a rak suak. A nu in Christian zum tu hoha tu le hruaitu pakhat si dingah a rak zuam pi. A nu in, “Ka fapa, nu pakhat in a fa a duhdawt zet bangin, ka lo duh ve a si. A sinain, sualpi pakhat na tuah hnak cun ka kehram ih na thi ding hman ka hmu duh sawn,” tiah a rak ti.

Kum 19 a ti ah Siangpahrang fanu Magaret thawn an thit awk ih fate hleikhat an nei a si. Louis cu a kum 22 ah France ram ih Siangpahrang a cang ih a danglam zet mi pakhat le ram uk thiam zet tu khal a si.

Thil a tuah mi hmuahhmuah cu Pathian sunlawinak le ram mipi pawl that nak ding hrangah a tuah a si. A myat ei a kham ruangah mifarah pawl a humhim ih zohman ih that lo nak thu khal ziang tik hmanah a rel dah lo.

A mah cu pawlpi duhdawt zet tu a si ih sual cawh kuan nak tuah nak dodal tu pawl khal ah hminthang zet mi a si. Mithianghlim Louis cu dodal tu pawl kha duhdawt lainat tu a si.

A pai thu ngai ih mi dodal tu Siangpahrang fapa pakhat an that ter tikah Mithianghlim Louis in a rak el ih, “Fapa pakhat in a pai ih tong el thei nak ding a nei lo,” tiah a rak ti.

A mah cu kum 1250 ah biak nak thawn a pehpar aw mi raldo nak ih hruaitu a rak si ruangah thawng a rak tlak. Thawnginn sung a um lai ah nitin ten thla a rak cam ringring. Thawnginn ih a suah hnu France ih a tlun hlan ah Holy Land ah a feh.

Kum 1270 ah a mah cu a dang biak nak thawn pehpar mi raldo nak ah a rak do. A sinain, a dam lo ruangah Katik ram kiangah a thi.

 A mai thlarau lam thawn pehpar mi caa a tan ta mi ah “Ka duhdawt zet mi ka fapa, nang mah le nangmah sual nak tuah ding ih na on in awk hlan ah ziangvek hrem nak khal nang mah le nang mah na on awk tul” tiah a rak ngan ta.

Mithianghlim Louis cu Siangpahrang pakhat a si nain a Nu le Pa thu a thlun tu le a ngai zet tu a si. Ram uk nak khal ah Pathian hmin sunlawinak le mifarah pawl hrang ruat in hna a rak tuan tu a si vek in pawlpi hrangah donak phunkim rak tuartu a si.

Siangpahrang dinhmun ah nuam le hngalhngawng zet in um men lo in Bawipai ram hrangah nasa tak in a rak tuan tu le a sual a palh nak parah sual cawh kuan nak tuar ngam tu a si ruangah Mithianghlim a caan nak a si.

Curuangah kan nih Christian pawl khal kan dinhmun cio ah um men in le hngalhngawng men lo in Bawipa hrangah tuan tlang uh si tiah kan run lo sawm a si.