Mithianghlim Pope Pius X (1835 – 1914)
August 21, 2025
Bawi Jesuh thi le sa a rinsan zet tu a pahra nak Pope Pius cu kum 1835 ah Venis khua kiang Reese khua ih lo thlo sung kha pakhat ihsin a rak suah. Puithiam a can hnuah cawllo in dungthlun tu hnatuan in a mah le mah a hmin a thang aw ter. Kum 1884 kum ah a nih cu Mantovua bishop ah an hril ih kum 8 a rei hnuah Venis khua ih arch bishop a rak cang. Kum 1903 kum ah a nih cu Pope ih a can nak thu cun mi zaten mang a bang ter. Amah cu fimthiam nak thu lam thiam nak ah siseh, kaihruai awknak lam hnatuan khal siseh hmun ton nak a rak nei lo. Amah cu Pathian ih minung menmen lawng a si.
A mai moto a si mi “Khrish Bawipa hnenah kan zaten a thar si dingah” ti mi pomphah in biak nak kha a thar thleng nak le baibal cathianghlim thawn pehpar mi zirnak pawl kha a rak tuah suak. A hmai sa bik Bawipai thisa cu kum 14 tia a kum 7 ah sang thei dingih on nak le minung pawl kha Khrih Jesuh ih ruangpum kha catbang lo ih sang dingih a forhfial nak ruangah Bawipa Jesuh thi le sa ih Pope ti ah a hmin a rung tang ta.
A pahra nak Pope Pius cu pawlpi ih Pathian thuthangtha phuang tu pawlkom khal a khaisan sak ih a felfai ih a ding mi vekih Pathian thu phuang dingah Puithiam pawl zaten ruah nak a rak pe.
A hnok mi Pope ih thurel khawm nak khaan thurel khawm nak thu ruangih a thin nom lo ruangah a rualpi hlun pakhat kha “Bawipa Jesuh cu Gesmani hmun sungih kaih a ton vekin an nih pawl cun kei cu ralkap pawl thawn in kulh” tin a rak sim. Europe ram pawl ram doawknak ah tel ve lo dingin kilhim dingih a zuam nak cu a lak ah a rak cang men. Augustilia, Hungary miphun pawl ih an siangpahrang in a ralkap pawl kha thlasuah pe dingih a dil tikah a nih in “Kei cu remdaih nak kha thlasuah ka pek. Do awk nak si lo” tin a rak sawn. Kum 1904 kum ah a veikhat nak leitlun ral a thoh hnu ni mal te a rei hnuah a nun nak a rak cem. Ca a tan ta mi ah “Kei cu farah zet in ka rak suak. Farah zetin ka nung ih farah zet ih thi dingah duh nak ka nei” tin a rak ngan.
