Nunram ah minungtam pi ih hmuh ton theu mi thil pakhat cu zangzel nak asi. Voikhat voihnih ahcun hnatuan ah zangzel, bang tuk ih cawl paih ti vek, thazang um lo vekin ziang hman tuah paih lo ti vek a si.

        A sinan zangzel nak cu dan pakhat vek ah a cangih na nunram a lo hup thei ahcun a poi tuk ding.  Zangzel nak ti mi cu na sunmang le na tumtah mi pawl ih a tum bik mi ral asi.

        Thil pakhat khat kha na tuah duh nan nehta ah ka tuah ding tin caan na rei ter a si le (a si lole) Thok ding ih thazang suah nak na tuah lo sile na caantha neih mi pawl cu nuam teten an hlo ral ding asi. Zangzel nak in dung ah a lo tang ter ding ih thanso nak pawl kha a lo phit sak ding asi.

        Tiluan nak vekin a fen vivo mi thil pakhat vekin ziang hman tuah thei lo in fen rero nak cu ngaingai ahcun nunram sung rero thawn a bang awk.

        Curuangah zangzel nak cu ziangtin kan phiat ding

Hmaisabik nak ahcu na tumram kha thaten thencat ta aw. Ziangruangah tuah a tul ti mi a hnetkhoh mi a san cu zangzel nak thinlung kha pahtlang thei ding in a ol sam thei ding asi.  Cule a fate mi kekar nak in thok aw. Peng tampi a hlat mi khualtlawng nak cu ke kar khat in a thok si lo maw.

        Voikhat ah thil tampi tuah ding zuam hlah. Tahthim nak ah cauk uk khat siar theh ding na zangzel sile nikhat ah cahmai mal te lawng siar ti vek si lole minutes mal te sung lehpan nak tuah thok aw. A thok thok ding cu a har bik mi asi.

        A dang pakhat cu daan neih ding le mah le mah kilkhawi awk thiam ding. Hna kha nehhnu hrang ah tin caan hngak lo in tuah cih aw. Zing tho kha tuan ten tho awla nitin tuah tul mi kha tha ten tuah aw.

        Zangzel nak thinlung a ra lut veten cu mi thinlung kha hlin awla tuah tul mi kha peh zulh in tuah aw. Na kiangkap mi pawl khal in tha a lo pek thei tu pawl le thin tha tho ding ih a lo tuah thei tu pawl kiang ah um aw.

        Sim sile cu zangzel nak timi cu na nunram ih sunmang pawl a lo phiat sak thei tu a dai mi ral asi. Tuni ihsin hlon hlo aw. Nangmah le nangmah manhlat aw awla nntam ah hlawhtlin na duh sile zangzel nak kha a hram ihsin hlon hlo aw.

        Na zuam sile na tuah thei dan kha ri khiah ti a um lo. “ Zangzel nak kha hlon hlo aw a silole a mah sawn lo a lo cemral ter ding” timi tongfang kha hngilh lo in na nunram kha a tha bik in nung aw.

        Zangzel nak cu lian nak hrang ih dawnkham tu pakhat asi vekin harsat nak khal a ko asi.