PASKA THUTHUK LE SACRAMENT TUAHNAK
Zo in Sacrament an Tuah?
233. Sumnak sungah zo so a cangvai?
Sumnak sungih a cangvai tu cu, Lu le Ruangpi a si mi, Khrih pumpuluk a si. Khrih cu puithiam sang a si bangtuk in vancung le leitlun ih a um mi Pawlpi (a maih ruangpi) thawn sumnak a tuah.
234. Vancung sumnak cu zo in a tuah?
Vancung sumnak cu vancung mi pawl, mithiangthlim pawl, a hleice in Pathian ih Nu Mary, Dungthluntu pawl, Pathian hrangih lole thuthik thuhman hrangih thah a tuar tu pawl, “siar cawk lo mi thianghlim pawl” (cf. Thuphuan 7:9) in an tuah a si. Sacrament sungih mangbangza kan rundamnak kan tuahnak in kumkhua sumnak ah kan tel a si.
235. Leitlun ih a ummi Pawlpi in ziangvek in so sumnak a tuah?
Leitlun ih a ummi Pawlpi cu tlangbawi miphun a si ih Pawlpi sungih a um tu pawl khal Thiang Thlarau ih pawlkomnak sungah mah le sinak vek in an cangvai cio ih sumnak an tuah. Tihnimnak ngah tu pawl in thlarau sumnak sungah an mah le an mah an hlan aw; thianghlim hriak culhnak a ngah tu pawl khal in Pawlpi zate hrangah sumnak an tuah; cun Bishop pawl le Tlangbawi pawl in Lu a simi Khrih sungah hna an ṭuan.
