Nan maih sumpai, thil lawng siloin nan tikcu caan hmunkhat um tlangnak le zangfahnak a tul tu pawl hrangah pek dingin Pope Leo XIV cun zumtu pawl in sawm a si.
Zarhtin zarhpi ni mipi thawn tonkhawmnak le sun thlacam caan ah Pope Leo XIV cun St. Peter kulhhruang ih pumkhawm tu pawl cu nan nunram ah a man khung mi thil hmuahhmuah ziang ti vekin nan khawl ti mithianghlim Luka nganmi ca thianghlim thawn pehpar ih thu sutnak a nei a si.
Bawi Khrih ih tong mi “Nan nei mi hmuahhmuah zuar uh la pek uh” tih thu a mah dungtluntu zum tu pawl cu Pathian hnen in kan ngah mi zangfahnak ah um men lo in, midang hrang siangzet in a tul tu pawl hrang pek cio dingin forhfialnak a nei.
Ka sim duh mi cu nan mah ih sumpai, thilri lawng siloin nanmah ih zangfahnak thinlung, harsat tuar pawl thawn hmunkhat um tlangnak, zawnruatnak lang ter ding, caan peknak le nan thiam mi le nan thei mi pawl cu midang hrangah hmang ding ti duhnak a si. Pathian ih khawkhannak ah kan mah pakhat ciar cu a man khung zet mi zangfahnak thawn tuah mi pawl kan si. Pathian ih zangfahnak a si mi nunnak le nitin zangfahnak pawl cu kan khawl a tul. Ka khawl lo a si le a siat ral ding asi.
Pathian pekmi thluasuah pawl kan hmang lo a si le hloralnak, sunralnak ah a cang ding. Pathian ih thluasuah pawl cu kan mah in sunglawi zet ah ka ret ding, a tul mi hmun pakhat kan ret ding, zalennak kan thangso ter ding. Hi thu pawl in kan mah cu Pathian ih hmuihmel thawn bang ternak ding a si.
Bawi Khrih Jerusalem khua a fehnak lamzin ah a mah nunnak thinglamtah parah thawinak thu thawn pehpar in Pope Leo cun zangfah lainatnak hnatuan cu a himbik le a hlawk zetmi kan maih nunram hrangah kan khawl ding asi. Thil fate zet zangfah lainatnak thawn kan tuah mi cu a sunglawi zetmi ah a cang thu, cathianghlim sungih tangka pahnih a hlu tu nupi nu thu, thil fate a hlunak in a mah a sunglawi zet a liannak a langter a si.
Minung pawl cu sui le ngun kan ngah tikah kan lungawi a si. Duhdawtnak thawn pekmi thil cu cuih pawl hnakin a sunglawi sawn ih kumkhua nunnak khal a ngah thei a si. Pektu ih nunram cu a thlengawk ter a si tin St. Augustine ih sim mi hmangin Pope cun in zirh a si.
Kan nitin nunah thuhman hmu thei dingin zoh uh. Pakhat le pakhat duhdawtnak lang ter ding, nu le pa, fale pawl zangfah lainatnak langter cu kiangkap hrangah zohthimtlak langternak a si.
Curuangah Inn ah kan um khal ah siseh, biakinn ah kan um khal ah siseh, cazirnak tlawngah kan um khalah siseh, hnatuannak hmun ah kan um khal siseh, duhdawtnak langternak remcang cu ka hlohter lo ding. Bawi Khrih ih catbang loin in dudawtnak cu kan mah khal midang pawl cat loin ka duhdawt a tul tin Pope Leo XIV cun zarhpi ni mipi tonkhawmnak ah a sim a si.
Hi thuthang cu Vatican thuthang ih kan don mi a si.
