224. Sacrament pawl cu ziang an si? Sacrament paziat a um?
Sacrament pawl cu Jesuh in a tuah ih Pawlpi hnenah a ap. Sacrament pawl cu zaangfah lainatnak ih hminsinnak pawl an siih milai in kan theithei. Sacramment pawl in Pathian nun cu milai hnenah pek a si. Sacrament pa sarih a um. Cumi pawl cu:
(1) Tihnimnak
(2) Christmas tha peknak
(3) Missa sumnak
(4) Sual thlahnak
(5) Mina hriak culhnak
(6) Puithiam cannak le
(7) Kutsihnak tla an si.
225. Sacrament pawl le Khrih cu ziangtin pehzom awknak an nei?
Jesuh ih nunnak cu mangbangza thawn a khat. Cuih mangbangza pawl cu Pawlpi ih hnaṭuannak in Jesuh ih a pek ding mi sacrament pawl ih hramthawhnak a si.
226. Sacrament pawl le Pawlpi cu ziangtin pehzom awknak an nei?
Khrih in a Pawlpi ih hnenah sacrament pawl a ap. Cu pawl cu thu pahnih ruangah Pawlpi ih sacrament an si:
(1) Sacrament pawl cu Pawlpi hnen in an si, kan tithei. Ziangruangah tile sacrament pawl cu Khrih ih cangvaihnak an si nan Pawlpi ih canvaihnak khal an si ve.
(2) Sacrament pawl cu Pawlpi ih hrangah a si. Ziangruangah tile sacrament pawl in Pawlpi an din a si.
227. Sacramental pawl cu ziang an si?
Sacramental timi cu Tihnimnak, Christmas thapeknak le Puithiam cannak sacrament pawl ih pek mi thlarau tacik a si. Hi sacramental cu Pathian kilkhawinak ih tiamkamnak le aa-mah-khan a si. Hi thlarau tacik ruangih zumtu cu Khrih sungah kharhkhum a si ih Khrih ih tlangbawi sinak ah phun tampi in a tel. Cun Pawlpi sung khal ah mah le dinhmun ih zir in ṭuanvo a nei. Curuangah zumtu cu Pathian biaknak ah siseh Pawlpi hnaṭuannak ah siseh a dang ce mi a si. Hi Tihnimnak, Christmas thapeknak le Puithiam cannak sacrament pawl cu dam sungah veikhat lawng ngah thei a si.
228. Sacrament pawl le zumnak cu ziangtin pehzomawk nak an nei?
Sacrament pawl ngah ding a si le zumnak a ṭul. Cuih zumnak cu sacrament pawl in an karh ter, thazang an pek ih an langter a si. Sacrament tuahnak in dungthluntu pawl hnen ihsin a rami zumnak cu Pawlpi in fiang ten a lang ter ih a phuang. Pawlpi in thla a cam vek in a zum, timi fiang ten a lang ter a si.
229. Ziangruangah sacrament cu milai thlarua ruangah hmual a nei?
Sacrament pawl in hmual an nei. Ziangruangah tile sacrament sungih a cangvai tu cu Khrih a si. Cun sacrament pawl ih an khih hmuh mi zaangfahnak laksawng thawn milai pawl cu Khrih in a peh aw ter a si. Sacrament pawl ih hmual an neih nak cu sacrament a petu (siangbawi lole saya tivek) pawl ih thianhlim le thianhlim lonak parah a ṭhum aw lo. Sacrament pawl ih ṭhatnak le hmual neihnak cu sacrament a sang tu nu lole pa ih thinlung um dan parah a ṭhum aw a si.
230. Ziangruangah sacrament pawl cu milai rundamnak hrangah an ṭul?
Khrih zumtu pawl hrangah cun sacrament pawl an ṭul a si. Ziangah tile sacrament pawl in zaangfahnak laksawng, sualthlahnak, Pathian ih fate sinak, Bawi Khrih hnenih pehzomnak le Pawlpi sung um sinak pawl an pe a si. Sacrament a sangtu pawl cu Thianghlarau in a damter hai ih an nunnak khal a thleng aw ter a si.
231. Sacrament zaangfahnak laksawng timi cu ziang a si?
Sacrament zaangfahnak laksawng cu Khrih ih pek mi Thiang Thlarau ih zaangfahnak laksawng a siih sacrament pakhat ciar thawn a remcang le a mil aw mi a si. Hi zaangfahnak laksawng in zumtu pawl cu thianhlimnak ngah thei dingin a bawm. Cun Pawlpi cu duhdawt lainatnak ih ṭhangso dingin le leitlun ih thuthangṭha phuan a bawm.
232. Sacrament pawl le kumkhua nunnak ih pehthlaih awknak cu ziang vek a si?
Pa Pathian le rundamtu Jesuh Khrih cu thawm huham thawi an rat ding hngak phah in (cf. Tit 2:13) Pawlpi in sacrament sungah kumkhua nunnak cu a tep a si.
