Biaknak Thu Ruahkhawm Daan Phunli
Jesu ih “zumtu pawl pumkhat si thei ding in” (Jn 17:21) tiih thla a cam mi timi a takih cangsuak thei
dingah biaknak thu ruahkhawmnak cu a thupi zetmi pakhat a si. Hi biaknak thu ruahkhawmnak cu
phunli in tuah a theih. Cumi phunli pawl cu (1) nunnak thawn ruahkhawmnak (2) tuahnak thawn
ruahkhawmnak (3) Pathian thu thawn ruahkhawmnak le (4) biaknak ih hmuhtonmi thawn
ruahkhawmnak tla an si. A tanglam ah phunhthumnak le phunlinak in zoh uh si.
(3) Pathian Thu Thawn Ruahkhawmnak: Biaknak thu ruahkhawmnak ah Pathian thu thawn
ruahkhawmnak (dialogue of religious experts) hi a thupizet le hmual nei zet pakhat a si. Himi
ruahkhawmnak ahcun Baibal thiam pawl (biblical scholars) le Pathian thu thiam pawl
(theologians) thuk zet le kau zet in thlacamnak le zumnak tivek pawl ruahkhawm le
hlawmkhawm awknak a si. Curuangah hi Pathian thu ruahkhawmnak ruang in pakhat le
pakhat asilolen khawhhran pakhat le pakhat hrangah a phunphun in thathnemnak tampi a um.
(4) Biaknak ih hmuhtonmi thawn ruahkhawmnak: Himi biaknak ih hmuhtonmi thawn
ruahkhawmnak ah (dialogue of religious experience) pakhat le pakhat cu biaknak lamih
hmuhton mi pawl, tahthimnak ah, thlacamnak thawn pehpar aw in siseh, peknak thawn
pehpar aw in siseh, zumnak le tuahnak thawn pehpar aw in siseh a phunphun relkhawm tlang
a si.
A thlun ih kan sim mi biaknak thu ruahkhawmnak daan phunli pawl tuah asilen a thianghlim le a
dikmi lungput nei tengteng ding a si. Biaknak ruahkhawm awk tikah pakhat le pakhat upatawk
ding. Cun tongnak caan khal pakhat le pakhat pek awk ding a si. Ziangruangah tilen thu
ruahkhawm awknak in lamzin pakhat lawng a nei lo; lamzin pahnih a nei a si. Khatlam khatlam
hnen ihsin zir ding an si veve. Kei ka thiam deuh; ka neh tengteng ding tivek lungput neih lo
ding. Tangdornak thinlung thawn biaknak thu ruahkhawmnak tuah ding a si. Culawngah a dik le
a hman mi biaknak thu ruahkhawmnak cu thaten tuah thei a si dingih Jesu ih thlacam mi “zumtu
pawl pumkhat ah cang thei ding in” timi hrangah thathnemnak tampi a nei ding a si.
Ronmi: Pontifical Council for Inter-religious Dialogue, Dialogue and Proclamation (1991).
