Thuhla sia

Voikhat laiah midang thurel a paih zettu nunau pakhat a um. A nin cu midang that lo nak thurel ding cun rawl ei tul lo khop in mi dang inn ah feh in rel paih vivo tu asi.

Nikhat cu cui mi thu rel paih zettu nunau nu cu a inn kiang ih a um tu pakhat ih thu kha sia zet in a sim vivo. A mai thuhla darh mi ruangah cui thu cu an khua zate tluk in a thang thlang. Cui rel a tuar tu khal mi hmaiah um ngam nawn lo ding tiangin a ning a zak thlang.

Ni malte a rei deuhah a relsiat mi thu kha a sual mi (a thalo mi) thuhla asi kha a thei. A sual ti a thei veten a mai hrang ah le a inn hnen pawl hrang khal ah a thinnuam lo tuk. Cu tin a mai sual nak

ruangah a innhnen ih ningzak tuar nak kha ziangtin kan rem sal thei pei tin thu a ruat. Sinan a phi a suak thei lo.

Cutin thuruat thiam tu mi pakhat hnen ah a feh. Cule thuhla um dan a sim ih ziangtin ka tuah sak le a tha ding tin ruah nak a dil.

Cui mifim pa cun hi tin asim. Dawr ah feh awla dawr ih ar pakhat kha lei awla that ter aw. Ar hmul pawl kha phoi ter awla inn na tlung nak lamzin tluanah cui ar hmul pawl kha lamzin ah hlon aw tin ruah nak a pek.

Nunau nu cu thuruat thiam pai ruahnak pek mi cu a mangbang tak nan zianghman tong lo in ruah nak a pek vekin Dawr ih ar cu a lei ih hmul phoi mi cu a tlung nak lamzin ah a hlon vivo.

A thaizing zinglam ah thuruat thiam pa cun nunau nu cu “ mizaan ih na hlon mi arhmul pawl kha va sar sal awla ka hnen ah rak keng aw” a ti.

Nunau nu khal mizaan ih a hlon nak lamzin kel in a feh ih a hlon mi pawl sar sal ding in a zuam nan mangbang tak ih a theih suak mi cu Ar hmul pawl cu thil in a hran hlo theh ih a hmuh nawn lo mi kha asi.

Nazi reipi zuam ih a hawl nan arhmul cu pathum te lawng a hmusal thei ih thuruat thiam pai hnen ah a kir sal. Thuruah thiam pa kha thuhla um dan a sim ih thuruat thiam pa in nunau nu kha hi tin a sim “Zoh, na hmu zo maw? Arhmul pawl na hlon lai ih a ol vekin tu lak sal ding cun a zaten sim hlah a hrek hman na ngah thei nawn lo. Tongnak khal ah cu vek asi. Mai kaa ih duhduh tong cu a olsam tuk, cule mithu hla sia karh ter ding a har lo tuk. Na tuah zo nan tu lawngah a sual zia na thei ih na lak kir sal duh hman ah a cang thei nawn lo, a ol nawn lo. Hi mi hi zir nakah hmang awla ziangvek thil khal ah na tong hlanah ruat hmai aw. Theih fiang lo mi thuhla kha ziangtik hman ah ol ten karh ter hlah aw tiah a ti.

Credit: