Thuthangtha sim tu – Rev. Fr. James Ngun Uk
August 4, 2025
Bawi Jesuh hming in rva falam service a ngaitu u le nau, ning veksen Pa Pathian in hmuifu ning pe tu sehlaw. Tun nia August 4, 2025 nia Pathian thu kin ruat tlang tuh hnak “Ning mah in ai pha pe tuih” ti hnak Bawi Jesuh ai ponkam ruat tlang tuh I sing. Cen tun nia thotho ah St. John Mary Vianney puuai nia khai i. Sangbawi te hrang a hlaice in sawngen sah nia i. Sangbawi te hrang sawngen sah tuh in ning sawm ing. “Sawngen hnak le suphnak um lo hmu ah khuasia um I” Mt 14:13 -21
St. John Mary Vianney thu ning rel tuh ing. A ling cia tu khai tam ngai um tuh I sing. A nu le pa te tu lovai mi te tin ling I sing. A kum upa hnua fang in Sang Bawi cang ngah lai le Ars Parish ah 1818 kum in naper ruai i. Khua pui tlawn hla i. Cia ta khua um lai ten ah Pathian thu rel lam in I tu seh, Sual hlat to lam I tu seh hming thang tu Sangbawi pakhat i. Ciatihin mi tampui in ling tlang le Ars khua a hnen ah kawi tlang de i.
Rikam, tihal tihnak heh a tuar har thil pakhat i. Amah thu nio in thinraw thei. Lai thianghlim kin siar hnak ah Israel mi te khai rilkam, tihal man in Moses hnenah phunkam murhmo hnak i. Mawh si in Egypt khua a um lain gai in um tlang i. Egypt kin um lai ah sa khai ai, ngasa khai, zil khai ai heta ah tu nisiar in manna lek ai tuh um tin cam tlang i. Kin pumpui ri kam, tihal bang in kin rauhla khai rikam, tihal in um de i. Tam sawn in rauhla ca ruat lo in kin pumpui ca lek ruat tlang de I sing.
Jesuh in, “Feh kul tuh lo I, ningmah in a mah te ai tuh rong pakhatkhat pe tuih”, pakhat le pakhat bawm dun tuh Jesuh in kin ruai i. Kin mah hrang lek ruat tuh li, mi hrang khai ruat tuh kin zirh i. Rilkam, tihal khai a phunphun um tuh i. Pumpui ri kam tu, rauhla rikam tu, thintha nau tu tin phun cang in kin um tuh i. Jesuh in tun nia kin zirh i. Amah rori in khai heh a thu ngai tute hrang rauhla rong lek pe lo inpum sa hrang khai pe i.
Sanghlom nga le nga pahnih thawn a thu ngai tu hmuahhmuah rong pe i. A pa hnenah khai anghnak thu rel lai i. A val hnak a hlai te khai phan nio in khul ruai i. Lovang cang ruai lo i. Ciatihin Israel mite in manna sang ei tlan i. Jesuh in kin rauhla rong caah amah ai thi le sa sacrament kin pe i. Kin pumpui le kin rauhla rilkam ti halt uh lo hnak zuam tlang tuh I sing.
