Thuthang timi cu ramkhelthu, nunphung thu sumdawnnak thu hrang lawng a thupi a si lo. Kan pawlpi hrangah khal a thupi zet mi a si. A thupi bikin a tulai caan ah san man thiamnak pawl hmangin Pathian thuthangtha an sim thei thlang a si. A thupi bik in thuthang thehdarh tu pawl hrangah kan tulbik mi thil pakhat asi. Curuangah Nu Pawlpi in Bawi Zesu vancung kaipuai zarpini cu “ Leitlun mipi pehtlaihawknak ni” tin hminsin in Pope Paul VI in 1967 ihsin a rak tuah fial a si.

Vatican thuthang thehdarh tu pawl cun a rei hlan, St. Peter tual rawn ih a thar an on mi studio thawn live thlah in an saan a si. Curuangah anmah pawl cu cibai thapek dingin Pope Leo XIV cu timlam cia loin a feh. Anmaih  zuamnak pawl ruangah  lungawithu a va sim a si.

Pope cu zarhpi ni sunlai caan thlacamnak camding pawl an thlah laiah Vatican thuthang thehdarh tupawl cu a cibai a si. A tu vekin studio thar on nak cu Jubilee kum sung biaknak, thlacamnak pawlah Pathian biak dingih ra mi pawl biakkhawmnak ah naizet in an tel theinak ding hrang tumtah a si.

Himi studio cu St. Peter tualrawn ih Bernini lungphun umnak lamah sak in on a si. Hi studio ihsin Vatican nitin thuthang asi mi “L, Osservatore Romano” le Vatican thuthang thlahnak zung thawn kawmawkin an thlah ding a si. Pope in Vatican ih thuthang pawl rangzet le dikzet ih thlah theinak ding, tawng phun 56 in thlah thei ding hrang hnatuantu zaten parah a lungawi thu a sim asi.

Hi thuthang thlahnak in Pope ih aw cu leitlun mipawl hnenah a thleng ter asi. Cuhleiah Pope in thuhman le remnak hrang thuthang cawl lo ih  thlah tupawl zaten parah a lungawi thu a sim a si.

Hi thuthang cu Vatican thuthang in kan don mi a si.