Thinghlam tu pai hnenih zirnak
Veikhat laiah a cak zetmi thinghlam tu Pa pakhat cu zanthing thawn
sumdawng tu pakhat hnenah hna a rak tuan.
Hlawh man a tha zetih a remcang zet mi hnatuan a si ruangah
thinghlam tu khal in tha te in hnatuan dingin thu a rak botcat.
A bawipa in Hreitlung pakhat a pe ih hna a tuan nak ding hmun cu
a hmuh. A Hmaisa bik ni ah thinghlam tu pa cu thingkung 18 a rak hau
thei.
A bawipa in “Na va thiam ve. Na cak tuk, hitin tuan vivo aw maw”
tin lungawi zetin a porh.
A Bawipai tongkam ruangah thazaang a ngah zet tu thinghlam tu
pa khal a thaizing ah zuam zetin a hau ko nan thingkung 15 lawng a rak
hau thei. A nithum ni ah zuam sinsin in a hau ko nan thingkung 10
lawng a hau thei. Nikhat hnu nikhat a hau mi thingkung cu a mal sinsin.
“Tha ka nei nawn lo. Ka cah nak pawl ka sung zo” tin thing hau tu
in a ruat ih a bawipa hnenah ngai thiam a va dil.
“Kei khal zuam zetin thing ka hau ko, ziang ka cang ti khal ka thei
lo” tin a ti.
A bawipa cun “Na hreitlung ziangtikah na tat neta bik” tin a sut.
“Hreitlung tat dingmaw? Thing tampi hau duh ih ka zuam nak ah
ka hreitlung tat nak caan khal ka nei thei lo” tin a sim.
Kan nunram khal thinghau tu pa ih a hreitlung a tat hngilh vek a si.
Nunram ih a thupi ngaingai mi thil pawl kha kan hmu lo theu. Mitam
sawn cu tuihlan ai in hnatuan an buai ko nan lungawi nak a mal.
Nunram ah a thu pi ngaingai mi pawl tuah dingah kan hngilh theu.
Mai tuah duh mi thil kha caan pe in tuah aw. Innsungsang le mai
duhdawt mi pawl hrangah caan pe deuh aw. Ca siar nak caan tuah aw.
Cawl ringring men lo in mai thiam nak kha thangso dingah tuah aw.
Harhdam nak kha ngaih sak aw. Mai theih thiam nak karh ter ding zuam
aw. Mai thiam hleice nak le cah lo nak pawl kha thei thiam in mah le
mah thanso ding le harhdam nak hrangah caan pe a tul.
Kan zaten cawlh hahdam ding, ruat ding, zir ding le thangso ding
hrangah caan kan tul. “Hreitlung” tat nak caan kan pek lo le kan nunram
pawl cu fim nak pawl kan sung dingih zahthlak le nin um mi nunram
pawl ah a cang ding asi. #crd
