Castel Gandolfo a suahsan hlanah Pope Leo XIV cun Journalists hrekkhat thawn biakawknak a nei ih tulai leilungtlun huap ih cang rero mi thawn pehpar in thusuhnak thenkhat pawl a let sal.

“Mi hmuahhmuah cu hriamhrei tansan dingin kan forh a tul ih, doawknak hmuahhmuah ih paisa hawlnak tansan ding in tla kan forhfial a tul”

Pope in Castel Gandolfo ih thal caan cawlhnak hmun ah ni 16 sung a um hnu ah a suahsan ih, Vatican ah a kir sal thu Journalist pawl hnenah a sim. Zan nazi pakua hlan kir tu Pope cun a tlungnak ding hmun ih rak hngak tu reporter pawl a biakih an thusut mipawl a let a si.

Gaza vekih ral ram tlawng ding thuhla ah Pope Leo cun “Hmun tampi a um” tin a sim fiang ih, cuih hmun cu tlawng dingin “ a feh duh, a si nan cu cu a tul bik mi a si lo’ a ti.

“Voi tampi ralthuam zuarnak ruangah minung pawl cu man nei lo le thilri vekmen ah an cang asi” tin a sim. “Minung hmuahhmuah, Khristian, Muslim, biaknak dangih a um mipawl hmuahhmuah minung sinak kan kil him a tul. Kan zaten Pathian fa, amaih hmuihmel kengih sersiam mi kan si . Curuangah himi cu pehzom in kan tuah a tul.

Castel Gandolfo ih a um sung thuhla a simnakah Pope cun “hi hmun hi keimah hrangah ziang hmuahhmuah a tha” tin a sim. A ne ta bikah “Pathian hnenah lungawinak um seh, kawhhran ih aw tla a thupi zet a si” tin Pope in a sim. Pope leo cun “remnak thangso sinsin dingin kan zuam pei” tin a sim a si.

Hi thuthang cu Vatican thuthang in kan don mi asi.