Pope Leo XIV cun July ni 18 ah a nunnak liam tu Cardinal Andre Vingt-Trois, Paris Archbishop emeritus cu, “ Tuu kilkhawitu tha le rinum tak” tiin a thei asi.
Pope Leo XIV cun kum 82 mi Cardinal Andre Vingt-Trois, July ni 18 ih nunnak liam cu a riahsiat thu a tuih French khuapi um Archbishop, Cardinal Laurent Ulrich hnenah telegram in a tuarthu ca a kuat asi.
A ca kuat ah, Pope cun Paris khuapi kawhhran Cardinal nunnak liam ruangih riahsia tu hmuahhmuah le “kum hleihnih sung tuu kilkhawitu tha le mi thahnem zet a si mi” hrang thlacamnak le a thinlung in a tuarpi thu a tarlang asi.
Pope cun ‘Netabik ni tiang Pathian hnatuannak ah a pekawknak le, a thi le Sa in petu Khrih ih Cross thuthangtha a phuannak, thihnak ih thosal kan Bawpa in rak hmuakin cawlhnak, daihnak, tleunak’ ngah dingin thla a cam sak.
Cardinal Andre Vingt-Trois vuinak Mass cu ni 23, zinglam nazi 10 ah Notre Dame Cathedral of Paris ah tuah asi dingih Archbishop Laurent Ulrich of Paris in a hoha ding. Pathian biaknak timtuah ding ruangah cathedral cu khar asi. Mikhual pawl hrang zanlam nazi 2:30 in on sal a si ding.
France ram kawhhran ih mi langsar zet, Cardinal Vingt-Trois cu kum 2007 ihsin 2013 tiang Bishop’ Conference ah president le kum 2005 ihsin 2017 tiang French khuapi ih Archbishop a si. Hi thuthang cu Vatican thuthang ih kangngah mi a si.
