Thingkhuat ih pek mi zirnak

Veikhat laiah putar  pakhat cu khuaah a mah ten umhar zet in a um. Nikhat ah putar pa cu a fapa, a mo le a tu le pawl umnak hmunah ka um ding ti mi ruahsan nak thawn khua ihsin a pok.

Cutin a feh vivo hnuah a fapa, a mo, a tu le pawl umnak inn cu a va thleng. A thlen veten cu a fapa tei sung cun lungawi zetin an rak hmuak. Ihnak khaan pakhat an rak pek. Cutin putar pa cu a fa le tei sung thawn an um ih zarh khat a kim.

Nitin ten an sungkua rawl an ei khawm theu. Putar pa ih mit cu a mal thlang. A kut pawl kha a kum upat thlang ruang ah an thia. Veikhat veihnih hai te pawl a thlak ngah theu vekin veikhat veihnih a pakaan sungih a rawl pawl cu zial ah a ter fuan theu.

Zarhkhat a um hnuah a fapa cu a mo in an tuar thei nawn lo. Cutikah thu an rel khawm. Ka pa rawl a ei tikah a fuawn ciamco ih keicu ka tuar thei nawn lo. Rawl a ei khal le a ka a awn. A bal tuk. Zial khal a bal. Pakhat khat kan tuah pei tin a nupi cun a rawn.

Cutin an nih cun an pu cu rawl hmun khat ah an ei tlang nawn lo ih khaan ih a kel te ah cabuai te pakhat thawn an ei ter. A pa cu thlalang pakaan thawn a ei khal sile tu le tu pakaan a tlak kuai ter ruangah a fapa in thing thawn kheng fate a tuah ih a pa cu cu mi thawn a ei ter. Cui sin thok in a pa cu daiten a kel te ah rawl a ei theu.

Veikhat veihnih a fapa le a mo nu ih thinheng ih kawk nak khal a tuar men theu. Cutikah nikhatah cu an fapa te cu inn hmai ah dai ten to in thil pakhat A tuah kha kha a hmu. Cutikah an fapa hnenah a feh ih a nu le pa in thlum zetmi aw thawn an sut. “Ka fapa… ziang na tuah” An fapa cun a nu le pa cu hni phah in a zoh. Cutheh in a sim.

“Kei khal nan mah vekin nan upat a sile rawl lo peknak ding hrangah Thingkhuat (thinghai) ka tuah rero” tin a ti ih an fapa cu a tuah mi hna cu a tuah sal. A nu le pa cu an fapa ih tong mi an theih tikah an mang a bang zet. An nih cun ziang hman an sim sal thei lo. ……….an biang in mitthli a luang. An sual nak kha an vun thei aw dukdi.

Innsung an vun zoh tikah putar pa cu daiten an mah pawl a rak thlir kha an vun hmu. Nang khal… nikhat ah putar pa vek in na tar leh ding. Nu le pa kha duhdawt thiam in tesin fa hrangah duhdawtnak kha lang ter aw. Nauhak pawl cun an tuah dan pawl kha an hmu, an thei, an hmin sin. Nan tuah mi zate cu nan hnen ah a kir sal ding.

Ni nikhat ni ah cun kan nih cu fa din hmun, nulepa dinhmun cutheh in pitar, Putar dinhmunah kan si leh ding.

Nu le pa duhdawtnak le zawnruahnak a san thiam sal tu fanu apa tha si hram uh si.