Catechism of the Catholic Church sungta kan run lo hlawm
196. Thianghlim Mary cu Pawlpi ih Nu a si, timi cu ziang ti can a si?
Thianghlim Mary cu Pathian ih zaangfah lainatnak ruang in Pawlpi ih Nu a si. Ziangruangah tile Pathian ih fapa Jesuh a hrin ruangah a si. Pawlpi cu Jesuh ih ruangpi a si. Ruangpi ih Lu cu Khrih a si. A thih hlan te Thinglamtah parih an thlai lai ah Jesuh in a dungthluntu ih hnenah a Nu cu a pek: “na nu zoh aw” (Jn 19:27) a ti.
197. Thianghlim Mary in Pawlpi cu ziangtin a bawm?
A Fapa Jesuh vancungih a kai ṭheh hnu in Thianghlim Mary in Pawlpi cu thlacamnak in a bawm. Bawinu Mary in a ruang pumpi thawn vancung ramih a kai ṭheh hnu khal ah leitlun ih a fale pawl cu a bawm ringring. Zumnak le mi hmuahhmuah hrangih duhdawtnak hnaṭuannak ih zohṭhim mi si dingin Khrih hnen ihsin a ngah mi laksawng hmangin Pawlpi a bawm a si. Zumtu pawl khal in Thianghlim Mary sungah thawhsalnak hmuihmel cu an hmu ih cuih thawhsalnak ih tel ve dingin Mary hnenah zaangfah bomnak an dil.
198. Thianghlim Mary hnenah ziangvek upatnak pek a si?
Thianghlim Mary hnenih upatnak kan pek mi cu Thianghlim Thumkom hnenih kan pek mi thawn a bang aw lo. A cuangce ih Pathian ih nu Mary hnenih kan pek mi upatnak cu thianghlim Rosary thlacamnak tivek pawl an si.
199. Ziangvek in Thianghlim Mary cu Pawlpi ih vancung ram ruahsannak a si?
Famkim zet ih a thianghlim mi, thlarau le ruangpi sunloihnak a co mi, Mary zoh tikah Pawlpi in hi leitlun ih a si dan ding le vancung ramih a si dan ding a ruat a si.
