(143) Minung pawl hrangah leilungpi ih pek mi rothil pawl thawn pehpar mi, thiamnak thawn pehpar mi, nunphung thawn pehpar mi pawl kha kan nei ko nan. Tuah cun cu pawl cu hringhro nak an tuar. Nunphung rothil pawl cu hmun pakhat ih hmun nei tu pawl an nei khawm mi thil a siih cui hram parah minung umnak khuapi pawl kha an sak.
Khuapi hlun, innhlunpawl kha an bal ih kiangkap thianfai nak a um ti mi khuapi thar pawl kha an sak konan veikhat veihnih umnak hmun tha an si hai lo. Hmun pakhat ih thuanthu, thiamnak, kutthiam pawl, nunphung pawl zate kha an kom ih hmunram nei tui rothil hlum pawl kha kil that bet a tul. Kiangkap kilhim nak ah minung pawl ih nunphung rothil pawl kilhim nak khal a tel.
Hmun pakhat ih kiangkap buai nak thuhla zinzoi tikah cui hmun ih nunphung kha kil tha in cathiam pawl ih tongkam pawl aiin hmunram nei tu minungpawl ih tong thawn relkhawm ih ronawk nak tuah a tul. Nunphung ti tikah a lian cia ihsin ngah mi rothil a si hleiah, nunphung cu a nungih thathoh nak thawn minung pawl kha in lem rero. Tuisan thawn a pehpar aw mi thil khal a si. Minung le kiangkap komawk nak ah nunphung kha hrial a ngah lo.
