Latin America ih Pathian thu zirhtu Saya pawl ih a vei 13 nak tonawk salnak le nihra sung tharthawh salnakih thu zirnak ah Pope Leo XIV in a tel tu pawl le a tawlreltu pawl zaten lungawi ten cibawi a buk ih biaknak thu zirnak ih tumtah mi Nazaret Khua ih Jesuh ih nun ram kha a thupi bik ih zoh in nun pi dingah a ruahsan thu a sim.
Nan thei cia mi duhnungza a si mi Bawi Jesuh ih thu kha mai nunram ah tharthawh ih ruahsalnak in Khrih ih thu kha sim duhnak thinlung, a riantuan duhnak karh ter in midang pawl in Pathian duh thiamnak an neih theinak ding, zumnakah hram bun in hoha nak, a mah riannak hnatuan kha tuah dingih thapeknak pawl thu a rak lang ter.
Latin America hmun tinah Pathian thu zirhtu Saya, Sayamah pawl ngaihven dingah le an mai bomnak in Latin America ih um Pawlpi ih hnatuannak ah bawm dingah SCALA kha 1995 kum ih rinsan tlak mi mifim pawl, hi thu hla a kilhimtu pawl thawn an rak din mi a si.
Tuikum July 7-11 tiang tuah ding mi conference ah Brazil, Ecuador, Peru, Bolivia, Chile, Honduras, Uruguay, Venezuela, Costa Rica, Argentina le Mexico ih rinsan tlak mi pawl an tel ih Pope Francis ih a rak thawh mi Synod thawn pehpar mi pawl kha ruat dingah le Saya, Sayamah pawl hrang Biaknak lam thuzirnak thawn pehpar mi hmuhdan pawl le lam hmuhnak pawl pe dingah ruahsannak a nei thu Vatican thuthangah a rak langter.
