Jesuh ih “zumtu pawl pumkhat si thei ding in” tiih thla a cam mi timi a takih cangsuak thei dingah biaknak thu ruahkhawmnak cu a thupi zetmi pakhat a si. Hi biaknak thu ruahkhawmnak cu phunli in tuah a theih. Cumi phunli pawl cu
(1) nunnak thawn ruahkhawmnak
(2) tuahnak thawn ruahkhawmnak
(3) Pathian thu thawn ruahkhawmnak le
(4) biaknak ih hmuhtonmi thawn ruahkhawmnak tla an si. A tanglam ah phunhnih in zoh uh si.
- Nunnak Thawn Ruahkhawmnak: Pathian thu ruahkhawmnak ah nunnak thawn ruahkhawmnak (dialogue of life) hi a thupizet le hmual nei zet pakhat a si. Milai cu mah te lawngih um mi kan si lo. Sungkhua, pawlkom, khuapi, u nau sungkhat, veng le hnen tivek thawn a um tlangmi kan si. Curuangah lungawinak siseh, riahsiatnak siseh kan simawk theu.
Hivek ih lungawinak le riahsiatnak thu pakhat le pakhat simawk le hlawmawk hi a tha zet. Thlarau lamih kan zoh a si len thusia thutha hlawmawk hi duhdawtnak phun khat a siih Jesuih thuthangtha sim le phuannak phunkhat a si. Hi nunnak thawn ruahkhawmnak hi hmuntin ah mizakip ih tuah thei mi a si. Zumtu pawl pumkhat si theinak ding hrangah tuah tengteng mi pakhat a si. A pahnihnak vun zoh bet uhsi.
- Tuahnak Thawn Ruahkhawmnak: Tuahnak thawn ruahkhawmnak (dialogue of deeds) timi cu zumtu siseh, zumlotu siseh misenpiih thansonak le luatnak hrangih lungrual teih hnatuan tlangnak a si. Khristian e, Khristian lo e, ziangmi kohhran e, ziangmi kohhran lo e, timi um loin mizapi ih thatnak hrangih hnatuan tlangnak a si.
- Photo courtesy – Vatican news
Tuahnak thawn ruahkhawmnak hi Asia ramah, a hleice in Myanmar ramah a thupi zet mi a si. Ziangruangah tilen Asia ram cu mifarah tampi umnak hmun a si. Thansonak hrangah tuan ding tampi a um. Cun mifarah bomnak hrangih tuan ding khal tampi a um. Bawi Jesuh in kei cu miih rian mi si dingah ka ra lo; mi riantu dingah ka ra a si (cf. Mt. 20:28) a timi cu zumtu pawl in tuahnak thawn ruahkhawmnak tuahnak in tuan a si ve. Pathian zumtu men lawng si loin a takih Pathian hnatuan tu khal an si (cf. Js 2:14-26), tinak a si.
Tongdangih kan sim a si len tuahnak le tuannak in Pathian thuthangtha phuangtu an si tinak a si. Tuahnak thawn ruahkhawmnak cu zo hmuahhmuah ih tuah thei mi a si. Curuangah Khristian pawl pumkhat si thei dingin tuahnak thawn ruahkhawmnak ah zumtu pawl tel ve dingin zuam a tul a si.
