Biaknak thu ruahkhawm tikah mi tampi in biaknak pakhat le pakhat ih bangawknak hnak in bangawk
lonak hi thupit ter a si sawn theu. Zumnak thu thawn pehpar aw in Catholic pawl le Khristian dang
pawl ih bangawknak pawl an um. Tahthimnakah, tikholhnak sacrament, Bawi Jesu zumnak, tivek
pawl an si. Asinan, khat lam ahcun bangawk lonak pawl khal an um ve. Thimnakah, Pope thu, Mary
thu, meikang ramte thu, sualthlah thu, Missa sumnak thu, zuk le milem thu, tivek pawl tla an si.
Biaknak thu relkhawm tikah mitampi in bangawknak hnak in bangawk lonak cu thupi sawn
ih an ret sawn theu ruangah thu relkhawmnak a tluang thei lo.
Khristian pawl Jesu Khrih ih pumkhatsinak lamzin a phit theu. Ziangruangah hitivek in bangawk lonak pawl cu thupi ih ret a si theu? Aruang cu a phunphun a um thei. Fiangteih kan sim thei mi pakhat cu biaknak thusimtu le sirhtu hrekkhat pawl ih zirh sual le hruai sual ruangah a si.Tahthimnak ah hrekkhat thusimtu le zirhtu pawl in Jesu ih thuthangtha hnak in biaknak dang ih thatlonak le famkimlonak tivek pawl thupi zet ih an simle an zirh ruangah a si.
Curuangah biaknak pakhat le pakhat nautat awknak, hmuhsual awknak,zumawk lonak, huatawknak tivek that lonak a phunphun a suak ter.
Biaknak thu relkhawmnak ah biaknak pakhat le pakhat thenaw tertu thu le hla pawl hnak in
biaknak pakhat le pakhat komaw tertu thuhla pawl cu thupit ter sawn ding a si. Himi thu thawn
pehpar aw in leitlun ih hminthang Karl Rahner in biaknak pakhat le pakhat kan bangawk lonak
lawng thupizet ih kan tlang aupi a silen in rundamtu Pathian kan biaknak, a zangfah lainatnak ih kan
um tlangnak le a thudik thuhman ih kan um tlangnak pawl a siatsuah ding a si, ralrinnak in pe. Cun
Congar timi pa khal in hitin a sim. Kan bangawk lonak cu biaknak thu relkhawmnak (interreligious
dialogue) le pumkhat (unity) si theinak dawnkhamtu si hlah seh, a ti.
A tawi zawng ih kan sim a silen biaknak thu relkhawm caanah biaknak pakhat le pakhat
thenthek aw tertu thuhla pawl hnak in pumkhat cangter tu thu le hla pawl thupi sawn ih rel ding a si.
Biaknak pakhat le pakhat thenaw tertu thuhla pawl cu nuam teten relkhawm vivo ding a si.
Ronmi Pawl:
- Joseph Ratzinger, Church, Ecumenism, and Politics: New Endeavors in Ecclesiology,
trans. Michael J. Miller (San Fransico: Ignatius Press, 2008), p. 119. - Karl Rahner, Foundations of Christian Faith, trans. William V. Dych (New York:
Crossroad, 2010), pp. 367-368.
