Jubilee kum, June 25-27 tiang tuah mi ram zate huap ih Puithiam pawl ih thurel khawm nak le Jubilee thurel khawm nak ih a ra tel tu Puithiam tlawngta pawl, ca zirh tu professor Puithiam pawl, thurel khawm nak ih a ra tel tu Puithiam pawl, Rome khuapi ih Conciliazione ih tonkhawm awk nak ah Pope in Puithiam tlawngta pawl tindaan pek nak, Puithiam nunram thawn a nai aw mi nan nih pawl cu “ziangtik hmanah pakhat lawng nan si lo” tin a ra tel tu pawl sim nak a rak nei.
A ra tel tu minung thawngkhat le zasarih (1700) hrawng cu Puithiam pawl tuanvo la tu Cardinal Lazzaro You Heung-sik in “Tuisun ih tonkhawm awknak cu menmen ih hmuhton awk nak a si lo ih thurel khawm nak lole tindaan pek nak thu thawn pehpar mi thu a si. A hleice ih an thuhla pawl cu suahkhat unau ngaingai vek ih hmuhton mi (Synodal) le a dik mi pawlpi thuhla kha rel khawm ding thu pehbet in Cardinal in a nuam mi Puithiam nunram ti mi cu menmen a si lo nitin nunpi dingmi thudik, thil cang thei mi a si.
A thupi mi cu Bawipa Jesuh thawn nai aw zet in um aw. Puithiam nunram ih thudik dinpi ding a si” tin a rak sim.
Pope Leo khal in Bawipa Jesuh tongkam a si mi “Nan nih cu ka rual tiah ka lo ko” hi tongkam cu menmen ih suak mi khal a si lo. Puithiam nunram kha fiang zet ih thei thiam dingin sullam in hmuh ter tu a dik mi tongkam a si.
Puithiam nunram thuzirh nak thawn pehpar aw in thu (3) khal hlawm nak a rak nei cih.
(1) Puithiam nunram thuzirh ti mi cu pakhat le pakhat thinlung hmuh awknak ih thenkhat a si. Hi thil cu thil thiam nak men si dingih zirh mi a si lo, cuimi thinlung nel awk nak sungah nunthiam dingih zirh mi a si. Curuangah Puithiam nunram ih thuzirh nak cu theih nak lam lawng zir hnak in Pathian thawn nai awk thei ding kha thupit ih ret duh mi a si.
(2) Suahkhat unau vekih duhdawt awk nak cu Puithiam nunram hrangah a tulsam bik mi thil a si. Curuangah Puithiam pawl le Puithiam tlawngta pawl tha ka lo pek duh mi cu khat le khat zuam aw ding a si lo. Bulpak ih umnak hmun khal a si lo suahkhat unau vekih um dingin tha ka lo pek duh.
(3) Puithiam nunram thu zirh ti mi cu bangran te ih riantuan nak, thlacam tlang nak, thu ngai thiam nak le khat le khat duhdawt awk theinak hi a si. Curuangah thuzirh tu (professor) pawl kha tha tei timtuah cia a tul. Puithiam cang dingih thuzirh ti mi cu mah te lawng um nak hmun a si lo. Pawlkom thawn um thiam dingin a si. Hi thil cu a thupi zet mi a si.
Pehbet in Pope Leo in kawh nak nunram thawn pehpar aw in Puithiam nunram le Pathian hnatuan nak pawl siatsuah ter tu thil pawl simfiang mi ah Puithiam nunram Pathian hnatuan kha rinum ten tuan thei dingin, zuam ringring thei dingin le kum a kim zo tu mipa tin in Puithiam nunram si dingin Pathian in a kawh ringring thu nan nitin nunram ah thin beidawng nak pawl, nuam zet le zalen nak pawl kha tih lo ih nunpi nak cu mino tampi kha a ko rero a si ti kha mang ringring aw. Pathian thawi pawlkom nak ih ngah mi nom nak kha a sut tu mino pawl kha hlawm ve aw. Cumi thil sungah na thinlung ih duh nak kha hawl aw.
Puithiam pawl thawn tongkhawm awk nak a cem hlan ah Puithiam pakhat in Pope kha pom in cibai a rak buk. Pope in ka pom ih ka cibai mi hi puithiam pakhat lawng a silo, nan zaten pom in ka lo cibai a si ti kha thei uh.
Kan zaten mitam hrangah pakhat kan si. Curuangah hihmun ah zohman pakhat lawng nan si lo. Mai nunram hrangah, thlarau lam thianghlim nak ngah dingin sualthlah nak ngai sak tu a tha mi Puithiam, thlarau lam hmun tu, thlarau lam khual tlawn nak ih feh pi tu tam pi an um ti kha thei aw.
Ziangvek harsat nak hmun ih na thlen khal le nang cu ziangtik hman ah pakhat lawng na si lo. Nangmah thawn mitampi an um. Pathian ih thlawsuah pawl thawn a mai a nai nak kha thei ringring aw. Hmunkhat tei lungrual zet ih kan um khawm nak cu leitlunpi hrangah a dik mi aw a si.
Translated by: Fr. Kyi Maung
News: Vatican News
