Khristian pawl pumkhat sinak (Christian Unity) hi Bawi Jesuh ih duhmi le thlacam mi a si.
Bawi Jesuh a thih hlan teah amah zumtu le thluntu pawl hrangah hitin a Pa Pathian hnenah thla a
cam: “An zaten pakhat an si theinak dingah thla ka cam a si. Ka Pa, nangmah cu ka sungah na umih
kei khal na sungih ka um vekin nannih khal kan sungah um ve hram hai seh. Nangmah in i thlah hi
leilung in an zum theinak dingah annih cu pumkhat ah cang hram hai seh. (Jn 17:21). Bawi Jesuh in
a thih hlan teih a thlacam mi a si ruangah ziangtluk in a thupi a si timi fiangten kan thei.
Tuilai Khristian pawl ih umtudan kan zoh tikah Bawi Jesuh ih thlacam mihi tlam a tling hrih
lo a si timi kan hmu. Baibal theihdan a bang aw lo; zumdan le pomdan a bang aw lo; thlundan a bang
aw lo. Curuangah leitlun ah “pawl” tampi a karh deuhdeuh. Cun, hmun tampi ah, pawlkhat le
pawlkhat kar lakah remawk lonak le huat awknak tampi a suak; pawlkhat le pawlkhat kar lakah a
phunphun in soisel awknak a um; pawlkhat le pawlkhat kar lakah theihsual awknak a um; pawlkhat
le pawlkhat kar lak ah zumawk lonak a um theu.
Cun Bawi Jesuh ih thlacam mi sungah zumtu pawl cu ziang vekih pumkhat si a tul timi khal
kan hmu. “Ka Pa, nangmah cu ka sungah na umih kei khal na sungih ka um vekin nannih khal kan
sungah um ve hram hai seh” a ti. Amah le a Pa Pathian le zumtu zaten pumkhat si ding hi a thlacam
mi a si. Asinan, a tlunlam ih kan sim zo vekin amah Bawi Jesuh le Pathian thawn Khristian pawl
pumkhat si ding cu sim hrih hlah uh si; zumtu pawl hman thinkhat lungkhat in an um thei hrih lo a si.
Bawi Jesuh in a Pa ih hnenih a thlacam mi sungah hitin kan hmu bet hrih: “Nangmah in i
thlah hi leilung in an zum theinak dingah annih cu pumkhat ah cang hram hai seh”. Bawi Jesuh cu
Pathian ih thlah mi a si, timi leitlun mi ih an cohlan ding hi Bawi Jesuh ih a duhbik mi pakhat a si.
Zumtu pawl pumkhat ih an can ahcun Bawi Jesuh cu Pathian ih thlah mi a si, timi cu leitlun mi in an
zum thei ding, tinak a si.
Phundangih kan sim a silen Bawi Jesuh cu Pathian ih thlah mi a si timi
leitlun mi ih an zum theinak dingah Khristian pawl pumkhat si a tul tinak a si.
Curuangah Khristian pawl thinkhat lungkhat teih pumkhat ih an can theinak dingah siseh,
Pathian le Bawi Jesuh le zumtu pawl pumkhat ih an can theinak dingah siseh, Bawi Jesuh cu Pathian
ih thlah mi a si timi leitlun mi ih an zum theinak dingah siseh, Khristian pawl ih biaknak thu
ruahkhawmnak cu a thupi zet pakhat a si. Bawi Jesuh ih thlacammi tlamtling thei dingin biaknak thu
ruahkhawmnak (ecumenical dialogue) tuah a tul a si.
Ronmi: – John Paul II, Ut Unum Sint, 1995
- Vatican II, The Decree on Ecumenism, 1964.
- Pope Francis, Evangelii Gaudium, no. 244-246.
